Áskerge shaqyrylýshylar bólimge kelgen sátten bastap áskerı ant qabyldaǵanǵa deıin bir aı daıyndalady. Osy kezeńde olar áskerı qyzmettiń negizderin ıgerip, bastapqy pánderdi, onyń ishinde saptyq daıyndyqtan ótip, dene shynyqtyrý, jalpy áskerı jarǵylar men áskerı qyzmettiń qaýipsizdik negizderin úırenýi kerek.
Jaýyngerlerdiń tezirek beıimdelýi úshin Desanttyq-shabýyldaý áskerleriniń áskerı bólimderinde eń tájirıbeli ofıserlerden, serjanttardan, psıhologterden turatyn jıyn ákimshiligi quryldy. Jıyn ákimshiligi bastyǵynyń aıtýynsha, kúzgi shaqyrylǵan jastardyń arasynda sportshylar kóp. Onyń ishinde jıyrmadan astam adam sport sheberligine úmitker jáne jekpe-jektiń túrlerinen dárejeleri bar. Mańǵystaý oblysynan bokstan el chempıony jáne grek-rım kúresinen Azııa chempıony da áskerge shaqyrylyp otyr. Merzimdi qyzmetin ótkerý barysynda olarǵa jattyǵý úshin qolaıly jaǵdaılar jasalatyn bolady. Sportshylar Qarýly kúshterdiń deńgeıinde ótetin jarystarǵa qatysa alady. Sporttyq arenada Desanttyq-shabýyldaý áskerleriniń namysyn qorǵamaq.
– Almaty oblysynyń «Ile» polıgonynda Astana qalasy, Shyǵys Qazaqstan, Jetisý, Abaı, Aqtóbe, Mańǵystaý, Túrkistan jáne Jambyl oblystarynan shaqyrylǵan 200-den astam bozbala jas jaýynger kýrsynan ótip jatyr. Búgingi tańda olar kún tártibi men jańa rejimge úırenip qaldy, – deıdi jıyn ákimshiliginiń bastyǵy, podpolkovnık Baqytjan Qyrǵyzalıev.
Ol ár sarbazdyń jeke basyn, minez-qulqy men erekshelikterin anyqtaý úshin psıholog-ofıserler áńgimelesýler men testileý ótkizetinin aıtty. Almaty garnızonynyń áskerı polısııasy qyzmetkerleri profılaktıkalyq jumystardy uıymdastyrady, ákimshilik jáne qylmystyq kodekster baptarynyń erejelerin túsindiredi.
Podpolkovnık B.Qyrǵyzalıev jastarmen bolatyn kúndelikti áńgimelesýden keıin 50-den astam sarbazdyń áskerge shaqyrylǵanǵa deıin tutynýshylyq nesıelerdi rásimdegeni anyqtalǵanyn aıtty. Qazir olarǵa «nesıelik demalys» resimdeý boıynsha jan-jaqty kómek kórsetilip jatyr. Bul merzimdi áskerı qyzmet ótkerý kezinde áskerı qyzmetshilerdi áleýmettik qorǵaý jáne olardy qoldaý jónindegi sharalardyń biri.
Astanadan shaqyrylǵan jıyrma jastaǵy Dmıtrıı Súleımenov mektepten keıin birden merzimdi qyzmetti ótkerý týraly sheshim qabyldapty. Biraq qorǵanys isteri jónindegi basqarmanyń shaqyrtýy bıyl ǵana qolyna tıgen. Ol kolledjdi jeńil jáne aýylsharýashylyq mashınalarynyń mehanıgi mamandyǵy boıynsha bitirgen. Alǵan mamandyǵy qyzmet barysynda kádege asatynyna senimdi. Jas jigit óziniń desanttyq-shabýyldaý áskerlerine qyzmet etýge kelgenin erekshe bir sezimmen aıtady.
– Jýyrda ǵana biz parashıýtpen sekirý alańyna bardyq. Onda kóktemde shaqyrylǵan jigitterdiń alǵash ret parashıýtpen sekirgenin kórip, tań qaldyq. Meniń de armanym – ózimdi synap kórý. Áskerdegi qyzmettiń arqasynda kóp uzamaı ol arman oryndalatynyna senimdimin jáne sol sátti asyǵa kútemin, – deıdi jas sarbaz.
Ásker qataryna shaqyrylǵan D.Súleımenovtiń úıinde ata-anasy, densaýlyǵyna baılanysty áskerde qyzmet ete almaıtyn syńary, mektepte oqıtyn kishi qaryndasy jáne bir jarym jasar inisi bar. Dmıtrıı barlyq sarbaz sııaqty apta saıyn úıine qońyraý shalyp, jańalyqtary men jetistikterin, komandırler men dostasyp úlgergen áriptesteri týraly aıtyp turady.
Jaqyn arada áskerge shaqyrylýshylar brondi mashınalarmen jáne alǵashqy atys qarýlaryn qoldanyp synaqtan ótedi. Sodan keıin olardy Áskerı ant berý saltanatty rásimi kútedi.
