Sýretti túsirgen – Erlan OMAR, «EQ»
«Daryn» respýblıkalyq ǵylymı-praktıkalyq ortalyǵynyń dırektory Ǵajdembek Tursynovtyń aıtýynsha, olımpıadaǵa aýyl mektepteriniń 9-11 synyp oqýshylary qatysa alady. Mundaǵy maqsat – elimizdiń shalǵaı eldi mekenderindegi daryndy jáne talantty balalardyń qabiletterin anyqtap, damytý, halyqaralyq olımpıadalarǵa qatysýǵa yntalandyrý.
– Respýblıkalyq olımpıadalarda akademııalyq adaldyqty qamtamasyz etý úshin tapsyrmalar ár qatysýshyǵa elektrondy túrde jeke jiberiledi. Olımpıadanyń barlyq kezeńinde oqýshylardyń aty-jóni jasyrýly turady. Ár kezeńnen keıin tapsyrmalardyń skanerlengen nusqasy, qatysýshylardyń jumystary men durys jaýaptary ortalyqtyń saıtynda jarııalanady, – deıdi «Daryn» respýblıkalyq ǵylymı-praktıkalyq ortalyǵynyń dırektory.
Joǵaryda atalǵan qaǵıdalardyń barlyǵy eń bedeldi álemdik IMO, IPhO, IChO, IBO, IGeO, IOI jáne IOL olımpıadalarynyń erejelerine súıenip jasaqtalǵan. Bul olımpıadalarda jeńimpaz bolǵan otandastarymyzǵa memleket tarapynan 500 aılyq eseptik kórsetkishten 1500 aılyq eseptik kórsetkishke deıin qarjylyq qoldaý kórsetiledi. Bıyl 23 oqýshy júldeli oryndarǵa ıe bolǵan.
– Otandyq oqýshylardyń osyndaı joǵary jetistikterin eskere otyryp, halyqaralyq uıymdastyrý komıteti bıologııadan eń bedeldi álemdik olımpıadany 2024 jyly Astanada ótkizý týraly sheshim qabyldady. Oǵan 80 elden 330-ǵa jýyq úzdik jas bıolog qatysady dep kútilip otyr, – deıdi Ǵajdembek Tursynov.
Oqý-aǵartý mınıstri Ǵanı Beısembaev atap ótkendeı, mundaı aýqymdy is-sharanyń ótkizilýi biz úshin úlken mártebe. Ári bul elimizdiń oqý-aǵartý salasyndaǵy úlken jetistik.
– Pándik olımpıada – balalardyń sanasynda alǵashqy ǵylymı izdenisterge jol salatyn, bolashaq ǵalymdardy shabyttandyratyn, ǵylymmen erkin aınalysatyn jastar tobyn qalyptastyratyn eń aýqymdy baǵdarlamalyq saıys. Otandyq mektep oqýshylarynyń bedeldi olımpıadalarǵa qatysý reıtıngi jeńis qorjynynda medaldar sanynyń kóbeıgenin, bilim sapasynyń artqanyn kórsetedi. Sondyqtan respýblıkalyq olımpıadalardyń árqaısysynyń sapaly ári joǵary deńgeıde ótýi mańyzdy, – deıdi Ǵanı Beısembaev.
Aıta ketý kerek, elimizde jyl saıyn jalpy bilim beretin pánder boıynsha mektep oqýshylary arasynda olımpıadalar uıymdastyrylady. Olarǵa 300 myńǵa jýyq mektep oqýshysy qatysady.
