Baıqaýǵa 14 nomınasııa boıynsha 70-ten asa ótinim túsken. Onyń ishinde 10-y mádenıet jáne óner, 31-i ádebıet, al 30-y jýrnalıstıka salasy boıynsha avtorlyq jumystar men jobalar. Kil myqtylardy «Qazmedıa» ortalyǵynda Mádenıet jáne aqparat mınıstri Aıda Balaeva men Qazaqstan halqy Assambleıasy tóraǵasynyń orynbasary Marat Ázilhanov arnaıy marapattady.
– Mańyzdy ulttyq mereke qarsańynda biz mádenıetaralyq jáne etnosaralyq birlikti nyǵaıtýǵa úles qosqan otandastarymyzdyń eńbegin maqtanyshpen atap ótkimiz keledi. Prezıdent Qasym-Jomart Toqaevtyń bıyl Qazaqstan halqy Assambleıasynyń sessııasyndaǵy tapsyrmasyna sáıkes «Mádenıet jáne óner salasyndaǵy úzdik týyndylar» jáne «Ádebıet pen jýrnalıstıka salasyndaǵy úzdik jumystar» ataýymen arnaıy syılyqtar taǵaıyndaldy. Bul marapat jýrnalıster, jazýshylar men óner adamdary úshin eń qurmetti jáne bedeldi syılyqtyń biri bolatynyna senimdimin. Sondaı-aq elimizde etnosaralyq kelisimdi qamtamasyz etýdiń jańa jáne tıimdi quraly bolady. О́ıtkeni syılyq sala azamattary úshin tyń serpin beredi ári etnosaralyq salanyń damýyn jańa deńgeıge kóteredi. Memleket basshysy, beıbitshilik pen kelisim bizdiń qoǵamdyq jáne eńbek qyzmetimizdiń ajyramas bóligi bolýǵa tıis ekenin atap ótti. Bul mańyzdy ıdeıa konkýrstyń qazirgi jáne bolashaq qatysýshylary úshin úlken mıssııa bolady dep senemiz, – dedi Aıda Balaeva.
«Úzdik kitaphana jobasy» atalymy boıynsha Nurııa Baımuratova Braıl júıesi boıynsha qazaq, orys jáne aǵylshyn tilderindegi «Qazaq halyq ertegileri» jobasymen jeńimpaz atandy. «Úzdik fılm» (kıno óneri) nomınasııasyna Sábıt Qurmanbekov «Kompozıtor» kórkem fılmimen ıe boldy. Dınara Myńjasarqyzynyń «Soile» aıdary boıynsha maqala-suhbattar toptamasy» ınternet-jobasy jeńimpaz dep tanyldy. Qazylar alqasynyń nazaryna «Úzdik baǵdarlama» (mýzyka) boıynsha «Uly dala murasy» jobasy da ilikti.
– Ejelgi saq, ǵun dáýiriniń kostıýmderin tigip júrgenime, jalpy kıim dızaıny salasynda 40 jyldan asa tájirıbem bar. Osy ýaqyt aralyǵynda elimizde qazaqtyń tól ónerin nasıhattaý, kıim-keshegin dáripteý, ilgeriletý maqsatynda biraz jumys isteldi. Bul meniń paryzym ispetti, – dedi Qazaqstannyń eńbek sińirgen qaıratkeri, ulttyq brend dızaıneri Múslim Jumaǵalıev.
Ádebıet salasynan úzdik proza retinde Nurjan Qýantaevtyń «Omartanyń oırany» týyndysy, al balalar ádebıetinen Patıgúl Mahsatovanyń «Men ádepti balamyn», Beıbit Sarybaıdyń «Dıadıa Vanıa» shyǵarmasy ozyq dep tanyldy.
Jýrnalıstıka salasynan «Kazahstan bez granıs» radıo jobasymen Tatıana Jandildına, telearnadaǵy «Edınyı narod» jumysymen Nadejda Belova marapattaldy.
«Poezııa» nomınasııasy boıynsha «Ararattan esken lep» shyǵarmasynyń avtory Ertaı Ashyqbaev jeńimpaz atandy.
Esterińizge sala keteıik, Memleket basshysynyń bastamasymen taǵaıyndalǵan syılyq eki jylda bir ret beriledi.
