Foto: Úkimet
«Eń aldymen, qaza tapqan kenshilerdiń týystary men jaqyndaryna qaıǵyryp kóńil aıtamyn. Marqumdardyń otbasylaryna barlyq qajetti kómek kórsetiledi. Zardap shekkenderge tezirek saýyǵyp ketýlerin tileımiz. Olarǵa tolyq kólemde medısınalyq kómek kórsetilip jatyr», dedi Álıhan Smaıylov.
Otyrys barysynda shahtadaǵy qazirgi ahýal, qutqarý jumystarynyń barysy jáne ózge de qabyldanyp jatqan sharalar týraly tolyq aqparat berildi.
Premer-mınıstr kásiporyndaǵy ónerkásiptik qaýipsizdikti qamtamasyz etý boıynsha jaǵdaı sol sheshilmegen ótkir kúıinde qalyp otyrǵanyn atap ótti.
Otyrys qorytyndysy boıynsha Úkimet basshysy Qaraǵandy oblysynyń ákimdigine TJM jáne basqa da memlekettik organdarmen birlesip, apatty joıý jóninde qajetti sharalar qabyldaýdy tapsyrdy.
Sonymen qatar Premer-mınıstr apat sebepterin jan-jaqty tergeý jáne kinálilerdi anyqtaý mańyzdy ekenin atap ótti.
Oǵan qosa Eńbek jáne halyqty áleýmettik qorǵaý mınıstrligine ákimdikpen jáne «ArselorMıttal Temirtaý» AQ-men birlesip, zardap shekken jáne qaza tapqan kenshilerdiń otbasylaryna kómek kórsetý, al О́nerkásip jáne qurylys mınıstrligine kásiporyndy Qazaqstan Respýblıkasynyń paıdasyna berý rásimderin aıaqtaý jóninde sharalar qabyldaý tapsyryldy.
Sonymen qatar Memleket basshysynyń tapsyrmasy boıynsha Komıssııanyń sheshimimen Vadım Basın «ArselorMıttal Temirtaý» AQ bas dırektorynyń mindetin atqarýshy bolyp taǵaıyndaldy.
V. Basın 2022 jylǵy qazan aıynan bastap Qaraǵandy oblysy ákiminiń birinshi orynbasary bolyp jumys isteıdi. Eńbek jolyn metallýrgııa kombınatynda elektromonter bolyp bastaǵan. Ulttyq quryltaı múshesi, «Qazaqstannyń Eńbek Eri» ataǵynyń ıegeri.
