Sýretti túsirgen – Tileýbek Shaıahmet
Saltanatty is-sharaǵa oblys ákimi Ermek Kósherbaev qatysyp, Shyǵys jurtyn Respýblıka kúnimen quttyqtady, el ekonomıkasynyń órkendeýine, ult rýhanııatynyń nyǵaıýyna aıryqsha úles qosqan azamattardy marapattady.
– 1990 jyly 25 qazanda Qazaqstannyń egemendigi týraly deklarasııa qabyldandy. Bul – Táýelsizdigimizdiń basty qujaty. 2022 jyly Memleket basshysy Qasym-Jomart Toqaevtyń bastamasymen Respýblıka kúni meıramy qaıta jańǵyrtyldy. Berekeli birlik pen yrysty yntymaqtyń arqasynda elimiz tabysty damyp keledi. Qazir memlekettiligimizdiń jańa dáýiri bastaldy. Basty mindet – halyqtyń jaǵdaıyn odan ári jaqsartyp, tabysyn arttyrý. Túrkistanda ótken quryltaıda Shyǵystaǵy Katonqaraǵaı, Marqakól aýdandaryn qalpyna keltirý týraly sheshim qabyldady. Bul – shekaralyq aımaqtardy damytyp, ulttyq qaýipsizdikti nyǵaıtý úshin mańyzdy qadam. Mereıli mereke qarsańynda Táýelsiz Qazaqstannyń damýyna erekshe úles qosqan jandarǵa qurmet kórsetemiz, – dep jyly lebizin bildirgen oblys ákimi Ermek Bedelbaıuly jemisti eńbek etken azamattarǵa «Parasat», «Qurmet», «Eńbek dańqy» ordenderin, «Eren eńbegi úshin», «Shapaǵat» medaldaryn tabys etti.
El úshin ólsheýsiz eńbek etip, keýdesine jarqyratyp tósbelgi taǵynǵandardyń qaı-qaısysy da marapatqa laıyq. Biri bilim berse, endi biri – adam jany úshin arasha túsip júrgen aq jeleńdi abzal jandar.
– Aıtýly mereke kúni qarsańynda azdy-kópti eńbegim baǵalanyp, marapattalyp jatqanyma qýanyshtymyn. Bul marapat búginge deıingi jumystyń jemisi, ujymnyń jeńisi dep bilemin. Kórsetilgen qurmet maǵan ǵana emes, búkil oblystyq densaýlyq saqtaý basqarmasyna tıesili. Merekemiz qutty, el irgesi tynysh bolsyn, – deıdi «Shapaǵat» medalimen marapattalǵan oblystyq Kópsalaly onkologııa jáne hırýrgııa ortalyǵynyń dırektory Gúlmıra Saǵıdýllına.
Sonymen qatar merekelik is-sharada ár salada aıanbaı eńbek etken birneshe azamatqa «Shyǵys Qazaqstan oblysynyń qurmetti azamaty» ataǵy berildi. Olardyń arasynda Túrki álemi jazýshylar odaǵynyń tóraǵasy, Memlekettik syılyqtyń laýreaty, aqyn Ulyqbek Esdáýlet te bar.
Osylaısha, el egemendigi jolynda ter tókken azamattar marapattalyp, ónerpazdar án-kúıden shashý shashty. Áýeli sahna tórinde kishkentaı baldyrǵandar «Týǵan jerim meniń, Qazaqstanym» dep, ánurandy shyrqady. Sodan keıin patrıottyq ánder tógildi. Shyǵystyń kúmis kómeı ánshisi Iýlııa Fýrman «Qazaq eli osyndaı» dep shyrqasa, «VOICE» kvarteti «Otan» ánin oryndady.
Sondaı-aq merekelik keshke jınalǵan meımandar «Abaı álemi» kitap kórmesi men arheologııalyq qazba jumystarynan shyqqan qundy eksponattardy tamashalady. Kitaphanashylardyń tól merekesi Respýblıka kúnimen tuspa-tus kelgendikten bolsa kerek, kitap kórmesine erekshe nazar aýdaryldy. Aıta ketsek, bıyl oblystyq bıýdjetten qalalyq, aýdandyq jáne aýyldyq kitaphanalardyń qoryn tolyqtyrýǵa, jańartýǵa 24 mln teńge qarjy bólinip, jańa kitaptar satyp alyndy. Sonymen qatar jyl saıyn oblys kitaphanalary «Abaı álemi» kitap serııasy jobasy aıasynda jaryq kórgen ádebıettermen tolyqtyrylyp otyrady. Esep-qısapqa kóz salsaq, 2018-2023 jyldar aralyǵynda barlyǵy 95 kitap basylyp shyǵypty. 2018 jyly jobanyń birinshi toptamasynda Abaı men Shákárimniń týyndylary jaryq kórdi. Sondaı-aq oǵan Fedor Dostoevskııdiń Semeıde ómir súrgen jyldary týraly shyǵarmalar men Ámire Qashaýbaevtyń 130 jyldyǵyna arnalǵan tarıhı derekter endi. Sondaı-aq bıyl jazýshy, dramatýrg, jýrnalıst Oralhan Bókeıdiń týǵanyna 80 jyl jáne Halyq qaharmany Qasym Qaısenovtiń týǵanyna 105 jyl toldy. Sondyqtan bıylǵy jınaqta Oralhan Bókeıdiń tańdaýly dramalary men Qasym Qaısenovtiń povesteri jınaqtalǵan.
Halyqty bir serpiltken saltanatty shara sońynda zor qurmetke bólengen azamattardyń qushaǵy gúlge tolyp, tarqasyp jatty.
Shyǵys Qazaqstan oblysy
