Byltyrdan bastap qaıta jańǵyrǵan Respýblıka kúniniń mańyzyna arnalǵan konferensııaǵa Astana qalasy Ishki saıasat basqarmasynyń basshysy Nurdáýlet Álmuhanov, memlekettik organdardyń, Astana qalasy Qazaqstan halqy Assambleıasynyń, qoǵamdyq qurylymdar men etnomádenı birlestikterdiń jáne úkimettik emes uıymdardyń ókilderi qatysyp, óz oıyn ortaǵa saldy.
Jıyn basynda sóz alǵan Ishki saıasat basqarmasynyń basshysy Nurdáýlet Álmuhanov jınalǵan qaýymdy aldaǵy merekemen quttyqtap, etnomádenı birlestikterdiń yntymaǵynyń mańyzyna toqtaldy.
«Búginde túrli ult ókilderi qazaq halqyn týǵanyndaı kóredi. Olar osynda ózderiniń ulttyq dástúrin, mádenıetin, ózindik ereksheligin saqtap qalýǵa múmkindik aldy. Halyqtar arasyndaǵy beıbitshilik óte mańyzdy ekeni belgili. Osymen ekinshi jyl jańa mazmunda toılap jatqan Respýblıka kúninde halyqtar arasyndaǵy beıbitshilik pen kelisim odan saıyn arta túsedi. Qaıta jańǵyrǵan ulttyq mereke – halqymyzdyń rýhyn kóterip, eldigimizdi nyǵaıta túsetin asa mańyzdy tarıhı qadam. Ulttyq tilimiz, dinimiz, rámizderimiz arqyly azattyǵymyz ben qazaqtyǵymyz aıqyndaldy. Munyń bári berekeli birlik pen eńseli eńbektiń arqasynda desek artyq aıtqanymyz emes. Elimizdiń eńsesi bıik, abyroıy asqaq bolsyn», dedi basqarma basshysy.
Parlament Senatynyń depýtaty, Qazaqstan halqy Assambleıasynyń múshesi Alısher Satvaldıev Qazaqstannyń egemendigi týraly deklarasııanyń mán-maǵynasyn árbir azamat jete túsiný kerek deıdi.
«Búgingi jıynǵa qatysyp otyrǵan aǵa-ápkelerimiz egemendiktiń alǵashqy jyldaryndaǵy aýyrtpalyqty, sol zamannyń qıyndyqtaryn tabandylyqpen eńsergenin jaqsy bilemiz. Egemendik týraly deklarasııa qabyldanǵan jyldary biz mektep jasyndaǵy bala bolǵandyqtan, bul qujattyń mán-maǵynasyn jete túsine qoıǵan joq edik. Eseıe kele bul kúnniń qanshalyqty mańyzdy ekenin, sondaı qıyn-qystaý zamanda elimizdiń Táýelsizdigin alýǵa jasalǵan alǵysharttardyń biri ekenin uǵyndyq. Sondyqtan da qazirgi tańda sońymyzdan ósip kele jatqan jas urpaqqa osynda jıyndar arqyly, ǵylymı-praktıkalyq konferensııalarda aıtyp, jastardyń sanasyna sińire bergen jón. Bar-joǵy 17-baptan turatyn deklarasııa zań turǵysynan kúshti qujat bolmasa da, saıası turǵydan Táýelsizdikke, odan keıingi qujattarǵa jol ashqan saıası qujat dep esepteımin», deıdi Senat depýtaty.
Is-shara barysynda baıandama jasaǵan Astana qalasy Qoǵamdyq keńesiniń tóraǵasy Zýlfýhar Ǵaıypov osydan 33 jyl buryn qabyldanǵan deklarasııa el Táýelsizdiginiń negizin qalap bergenin, osy qujat arqyly elimizdiń rámizderi, Qazaqstannyń terrıtorııasy bekitilgenin atap ótti.
«Uzaq úzilisten keıin bıyl ekinshi márte toılanyp jatqan Respýblıka kúni elimizdiń ulttyq merekesine aınalyp úlgerdi. Egemendik jyldary Qazaqstan qyrýar tabystarǵa qol jetkizip, ishki-syrtqy saýda-sattyqty bir izge qoıdy. Tipti osy qujat arqyly elimizdiń Táýelsizdigi de qabyldanǵanyn aıta ketken jón. Sondaı-aq ishki saıasatta, onyń ishinde ulystar birligin saqtaýdaǵy saıasaty jaqsy júzege asty. Osy kúnge deıin Qazaqstan deıtin ortaq otanymyzda ulystar arasynda asa kúrdeli birde-bir kıkiljiń, janjal bolǵan emes. Osy arqyly elimizdiń ishki saıasaty durys baǵytta atqarylyp jatqanyn baǵamdaı berýge bolady. Bizdiń baılyǵymyz da, bizdiń kúshimiz de – birlikte. Birligimizdi árqashan ardaqtaı bileıik», deıdi Z.Ǵaıypov.
Sondaı-aq konferensııa barysynda tarıh ǵylymdarynyń doktory Alıma Aýanasova, Astana QHA Ǵylymı-saraptamalyq tobynyń múshesi Tatıana Brynza, L.N.Gýmılev atyndaǵy EUÝ dosenti Gúlnar Qajenova Respýblıka kúnine oraı baıandama jasady.
