FOTO: kaz.inform.kz
Bireýdiń otbasyn asyrap otyrǵan otaǵasy, bireýdiń jalǵyz balasy aıaq asty qaterden o dúnıelik boldy. Báriniń otbasy men týystaryna qaıǵyryp kóńil aıtamyz. Aýrýhanada em alyp jatqan adamdardyń tezirek saýyǵyp, aıaqtarynan tik turyp ketýine tilektespiz.
Apat bolǵannan keıin Prezıdent «ArselorMıttal Temirtaý» kompanııasyna qatysty Úkimetke tapsyrma berdi. Qazirgi kúni bul mekemege 8 shahta jáne qurysh balqytý zaýyty qaraıdy. Endi olardyń jaǵdaıy qalaı bolady? Jumysshylary dalada qalmaı ma degen qaýip aıtylyp jatyr. Memleket eshkimdi dalada qaldyrmaıdy. Buǵan eshkim alańdamasyn. Qordalanǵan barlyq másele sheshimin tabady. Eń bastysy, zardap shekken adamdardyń otbasylaryna tıisti járdem berilýge tıis. Memleket tarapynan da, kompanııa tarapynan da járdem bolady. Sonymen qatar Úkimet tıisti qaýly qabyldap, kadr máselesin sheship, qaýipsizdikti arttyrýǵa baǵyttalǵan sharalardy qolǵa alýy kerek.
Elimizde jumys istep jatqan osyndaı iri jekemenshik kompanııalarǵa qatysty zańdarǵa ózgerister engizilýi qajet dep sanaımyn. Áý basta olarǵa kóp erkindik berilip qoıdy. Sonyń saldarynan jumysshylardyń jaǵdaıyna salǵyrt qaraý basym boldy. Saldary – kóz aldymyzda. Olar óz jumysshylarynyń barlyq jaǵdaıyn jasaýy qajet. Jalaqysynan bólek, qaýipsizdigi, áleýmettik kómegi, em-domy, tamaǵyna deıin barlyq qajettilikterin oılastyrýǵa tıis.
Al keshegi apatqa jol bergen barlyq laýazymdy tulǵa jaýapqa tartylýy kerek. Muny qazir qoǵam da kútip otyr. Eger tıisti jaza bolmasa, osyndaı qaıǵyly jaǵdaılar jalǵasa beredi. Meıli ol sheteldik, meıli óz azamatymyz bolsyn, zańǵa saı jazasyn alady. Is qozǵaldy. Endi nátıjesin kútemiz.
Qudaıbergen BEKSULTANOV,
Májilis depýtaty
