Osy ýaqytqa deıin «ArselorMıttal Temirtaýǵa» qarasty ken oryndarynda bolǵan apattan 100-den asa adam qaza tapqan, 150-den asa adam túrli deńgeıdegi jaraqat alǵan. Onyń ishinde jaraqatynyń aýyrlyǵynan múgedek bolyp qalyp, eńbekke jaramdylyq qabiletinen aıyrylǵandary da bar. Byltyr bir aptanyń ishinde bes jumysshynyń qaza bolǵany esimizde. Bıyl tamyz aıynda «Kazahstanskaıa» shahtasynda bolǵan órt saldarynan 4 adam baqılyq boldy.
Sarapshylardyń aıtýynsha, bul apattardyń barlyǵy óndiristik qaýipsizdik erejelerin saqtamaýdan týyndaǵan. Bul týraly kompanııaǵa memleket tarapynan talaı aýdıt júrgizilip, monıtorıng jasaldy, kompanııa basshylyǵyna talaı eskertý jasaldy, aıyppuldar salyndy.
Tamyz aıyndaǵy apattan soń Prezıdent Qasym-Jomart Toqaev atyshýly kompanııanyń ornyna basqa ınvestor tabý týraly Úkimetke tapsyrma bergen edi. Osy jolǵy apattan soń «ArselorMıttal Temirtaý» kompanııasymen ınvestısııalyq kelisimdi buzý týraly sheshim qabyldandy. Bul kóptiń biraz ýaqyttan beri kútken jańalyǵy bolǵanymen, mundaı sheshim bir kúnde qabyldanbaıdy, sebebi onyń quqyqtyq astary kóp. Shamasy, byltyrdan beri júrgizilgen tekserýler men birneshe aıdan bergi kelissózderdiń qorytyndysy osyǵan ákeldi.
Osy tusta eskeretin birneshe másele bar. «ArselorMıttaldyń» ornyna kim keledi? Otandyq ınvestor bolsa, quba-qup. Ekinshi másele – kompanııaǵa qarasty ken oryndaryna tolyq tekserý júrgizip, eńbek qaýipsizdigin qamtamasyz etý kerek. Memleket úshin azamattardyń ómiri men qaýipsizdigi – eń birinshi kezekte turǵan másele. Bul rette Prezıdenttiń apat ornyna dereý jetip, bar jaǵdaıǵa ózi qanyǵyp, naqty aqparatty alýy, shuǵyl sheshim qabyldaýy – quptarlyq is.
Taǵy bir másele – memlekettiń halyqaralyq bıznes-qaýymdastyq aldyndaǵy ınvestısııalyq bet-beınesin saqtap qalý, Qazaqstannyń ekonomıkasyna qarjysyn salýǵa daıyn, óz isine adal sheteldik ınvestorlardy tartý. Buǵan deıin «ArselorMıttal» ken oryndaryndaǵy óndiris qaýipsizdigin saqtaýǵa qatysty, jergilikti halyqtyń densaýlyǵyna tıgizgen zııany men qorshaǵan ortany lastaýdy azaıtýǵa qatysty berilgen shaǵymdar men eskertýlerdi durys oryndaǵan joq. Muny dáleldeıtin aıǵaq jetkilikti. Sonda da kompanııamen kelisimshartty birjaqty túrde buzý halyqaralyq deńgeıdegi janjalǵa aparmaýyn qadaǵalaý kerek. Iаǵnı memleket múddesin kim qalaı qorǵaıdy degen máseleni jiti qaraý kerek. Bul oraıda, Prezıdenttiń kásibı bıliktiligi, halyqaralyq arenadaǵy tájirıbesi men bedeli kómek bolary sózsiz.
Abzal QUSPAN,
Májilis depýtaty
