Elimizdegi tuńǵysh joǵary oqý orny – Abaı atyndaǵy Qazaq ulttyq pedagogıkalyq ýnıversıteti joǵary jáne joǵary oqý ornynan keıingi bilim berý salasyndaǵy iri ǵylymı jáne pedagogıkalyq bilim berý ortalyǵy bolyp tabylady.
Bastaýynda Ahmet Baıtursynuly, Temirbek Júrgenov, Halel Dosmuhamedov, Sáken Seıfýllındaı zııalylar, qoǵam qaıratkerleri turǵan oqý orny kúni búginge deıin elimizde bilikti muǵalim kadrlardy daıarlaýda kóshbasshy bolyp keledi. Oqý ordasynan ǵasyrǵa jýyq merzimde 200 myńǵa jýyq pedagog, 4 myńnan asa ǵylymı kadrlar qanattandy.
Abaı atyndaǵy opera jáne balet teatrynda ótken saltanatty sharada mártebeli ustazdar qaýymyn Ǵylym jáne joǵary bilim mınıstri Saıasat Nurbek quttyqtady. «Ustazdar ustahanasy, bilim men ǵylymnyń altyn ordasy atalǵan qart QazPI-diń ataýly datasy elimizdegi bilim berý júıesine ortaq mereke. Bilim ordasynyń jetken jetistiginde qazaq halqynyń aıaýly tulǵalary, alash qaıratkerleriniń eńbegi jatyr. Búginde bilim bıiginde turǵan oqý ordasynyń professorlyq-oqytýshylar quramynyń jemisti eńbegin erekshe atap ótý kerek», dep atap ótti ol.
Ýnıversıtet rektory Bolat Tilep ult zııalylary bastaýynda turǵan «ustaz» atty atty ulyq mamandyqtyń rýhanı ordasy Abaı ýnıversıteti osy jyldarda elimizdegi bilim oshaqtaryna kóptegen bilikti kadrlar daıarlaǵandyǵyn jetkizdi. Rektordyń aıtýynsha, kezinde 9 oqytýshy ǵana bolǵan oqý ordasynda búginde 5 akademık, 6 UǴA korrespondent-múshesi, 220 ǵylym doktory men phd, 260-tan astam ǵylym kandıdaty, barlyǵy 900-den astam professorlyq-oqytýshylyq quram 16 myńnan astam stýdentke zamanaýı bilim berip keledi.
Aıtýly jıyn barysynda Almaty qalasy ákiminiń apparat basshysy Beıbit Shahanov qala ákiminiń quttyqtaýyn oqysa, UǴA vıse-prezıdenti Aqylbek Kúrishbaev muǵalim kadrlardy daıarlaýda kósh bastap turǵan oqý ornynyń mereıtoıyna Ulttyq ǵylym akademııasy joldaǵan quttyqtaýdy jetkizdi.
Ýnıversıtettiń álemdik bilim keńistiginde jetistikke jetýine zor úles qosyp júrgen oqytýshylar qaýymy osy jıynda arnaıy marapatqa ıe boldy. Oqytýshy-ustazdarǵa medal, tósbelgilerdi Ǵylym jáne joǵary bilim vıse-mınıstri Talǵat Eshenqulov tabystap, aıtýly merekemen quttyqtap sóz sóıledi.
Búginde ýnıversıtet álemniń 25 memleketiniń 138 joǵary oqý oryndarymen áriptestik baılanysta jumys isteıdi. QS World University Rankings álemdik reıtınginde bıylǵy jyldyń qorytyndysy boıynsha 681-690 oryndy ıelenip, álemdegi úzdik 700 ýnıversıtter qataryna endi. Ortalyq Azııa aımaǵynda 147 orynmen TOP-200 úzdik ýnıversıtetter qatarynda. Turaqty damý maqsattaryn basshylyqqa alǵan THE Impact Rankings reıtınginde ýnıversıtet 601-800 pozısııadan kórinip, Qazaqstandyq ýnıversıtetterdiń arasynda kósh bastap tur.
Merekelik is-sharada Qazaqstan etnıkalyq dızaınerler odaǵy qolóner sheberleriniń kórmesin ótkizip, ýnıversıtettiń tarıhy men búgingi tynys-tirshiligi týraly derekti fılm kórsetildi. Ári qaraı merekelik jıyn óner maıtalmandarynyń konsertine ulasty.
ALMATY
