«Hero Training» baǵdarlamasynyń ekinshi kezeńi kásipkerlerdiń úlken qyzyǵýshylyǵyn týdyrǵan. Qazaqstan, Qyrǵyzstan, О́zbekstan, Tájikstan, Mońǵolııa, Ázerbaıjan jáne Túrkııa startaptarynan barlyǵy 129 ótinim tústi. Startaptar skrınıngtik, dıagnostıkalyq qatań irikteýden ótken. Jobalardy dıagnostıkalaý qortyndysy eki aptaǵa sozylǵan. «Fundamentals of Entrepreneurship» onlaın-akselerasııasyna qatysýǵa 80 startap tańdalǵan. Al Kremnıı alqabyndaǵy «Draper University»-degi «hero Training» oflaın akselerasııasyna qatysýǵa tek 12-si irikteldi: «AlgoFarm», «Prosper Pay», «Loca, Pipedata AI», «EZ FACTOR», «Hired Valley», «TrustMe», «myMind», «Oku Toku», «WhoockAI», «Oraclus», «CheckAuto».
– «Hero Training» músheleri «Draper University» kampýsynda alty aıǵa deıin ýaqyt ótkizedi, onda olarǵa baspana men jumys keńistigi beriledi. Bul ýaqyt tájirıbeli tehnologııalyq kásipkerler men «Draper University» ekojúıesiniń sarapshylarynyń basshylyǵymen jumys isteı otyryp, startaptarǵa ınvestısııa tartýǵa jáne amerıkalyq naryqqa shyǵýǵa biregeı múmkindik beredi. Osy jyldyń mamyr aıynda Kalıfornııaǵa barǵan 15 startaptyń birinshi leginiń túlekteri oqýdy sátti aıaqtap, qazir ónimdi damytý, ınvestısııalardy tartý jáne óz jobalaryn álemdik deńgeıde masshtabtaý boıynsha belsendi jumys istep jatyr, – dedi «Astana Hub» bas dırektory Maǵjan Mádıev.
Esterińizge sala keteıik, Tım Dreıper «Digital Bridge – 2023» forýmynda sóılegen sózinde «Astana Hub»-ta meni óz energııasymen qýattaǵan adamdarmen kezdestim. Bul úlken áleýeti bar elge kózimdi ashqan óte qyzyqty tájirıbe boldy. Mundaǵy adamdar bilimdi jáne yntaly. Shynynda da, Qazaqstan Ortalyq Azııa úshin IT-habqa aınalýy múmkin», degen edi.
«Draper University»-men yntymaqtastyq týraly shartqa Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsınniń AQSh-qa resmı sapary kezinde qol qoıylǵan edi. «Draper University» – Kremnıı alqabynda bedeldi ári burynnan qalyptasqan ekojúıe. Al «Astana Hub» – Ortalyq Azııadan onymen seriktestik baǵdarlamany iske qosqan alǵashqy tehnopark.
