Úsh aýdannyń jurtshylyǵy ala tańnan turyp, saılaý ýchaskelerine shubyrdy. Mysal úshin Aqtoǵaı aýdanynda 28 saılaý ýchaskesi ashylsa, mundaǵy saılaýshylar sany 8 480 adamdy qurady. Onyń ishinde 108 turǵyn alǵash ret daýys berdi. Halyq sany boıynsha tórt iri saılaý pýnkti tirkelse, eń alysy Sholaqsor aýyly aýdan ortalyǵynan 164 shaqyrym jerde ornalasqan.
Jelezın aýdanynyń halqy da bul kúni erekshe belsendilik tanytty. Ákim saılaýynda barlyǵy 10 443 azamattyń daýys berýge múmkindigi bolsa, saǵat on birler shamasynda 2,5 myńǵa jýyq adam saılaý ýchaskelerine barǵany tirkeldi. Aýdandyq aýmaqtyq saılaý komıssııasynyń tóraǵasy Altyn Kárimova atap ótkendeı, óńirde 242 turǵyn úıden daýys berýge ótinish túsirgen. Olar úshin barlyq ońtaıly jaǵdaı jasaldy. Al Sharbaqty aýdanynda bul kúni 12 897 daýys berýshi úshin 26 saılaý ýchaskesi jumys istedi.
Atap óteıik, bul kúni Jelezın aýdanynda – úsh, Aqtoǵaıda – úsh jáne Sharbaqty aýdanynda eki kandıdat daýysqa tústi.
Oblystyq aýmaqtyq saılaý komıssııasynyń tóraǵasy Gúlnar Amanjolova habarlaǵandaı, saǵat 16.00-de úsh óńir boıynsha daýys berýshilerdiń 46,6 paıyzy óz tańdaýlaryn júzege asyryp úlgerdi.
Toraıǵyrov ýnıversıtetiniń professory, saıası ǵylymdar kandıdaty Ildar Qalıevtiń pikirinshe, aýdan ákimi laýazymy – jergilikti memlekettik apparattyń tiregi jáne negizgi býyny. «Halyq jergilikti atqarýshy bıliktiń basshysynyń óz qalaýymen saılaǵan soń óńirlerde Memleket basshysy jarııalaǵan salyq jáne bıýdjet saıasatyn ortalyqsyzdandyrý esebinen ekonomıkalyq derbestik paıda bolady», dep esepteıdi maman.
Pavlodar oblysy
