Buǵan deıin aqynnyń sezimge toly syrshyl óleńderi engen «Sert» atty alǵashqy kitaby oqyrmanǵa jol tartqan edi. Ony poezııany súıip oqıtyn qaýym jyly qabyldady. Biz sóz etip otyrǵan ekinshi jınaqqa Jánibektiń keıingi jazǵan jyrlary toptastyrylǵan. Dástúrli qazaq óleńiniń úlgisin buzbaı, jańasha jazýǵa umtylǵan aqynnyń oıly, otty óleńderi eshkimdi beıjaı qaldyrmaıdy.
Máselen, myna bir shýmaqqa zer salyńyz:
«Jyr tilinde kisinegen
qulyn qyrat,
Túlki ińirge tutyldy
kúnim qulap,
Keshe jazyp jubanǵan
jibek kóńil,
Taǵy mazam bolmady
búgin biraq...»
Osy tórt qatar jolda sýret deısiz be, kóńildiń nazy deısiz be, sózdiń sazy deısiz be – bári bar. Aqynnyń jańa jınaǵynan osyndaı bir demmen quıylyp túsken óleńderdi jıi kezdestiresiz. Buǵan dálelimizdi osy kitapqa jazǵan alǵysózinde belgili aqyn Dáýren Berikqajyuly túıindeı túsedi. «Otyzǵa endi shyqqan Jánibekte shań basqan jadyńdy dúr silkintip jiberetin etnografııalyq óleń de, «mynaý qaıtedi, eı» dep eriksiz bas shaıqatatyn tabıǵat lırıkalary da jetip-artylady. Bizdiń maqsat – solardyń bárin jeke-jeke taldap, Jánibekti «ótkizý» emes, kólgir keńistikte móldir júrekpen óleń jazyp júrgen oǵlanǵa kóńilimizdiń iltıpatyn jetkizý ǵana...», depti ol. Osyǵan bizdiń de alyp-qosarymyz joq. Jyr báıgesinde juldyzyń joǵary bolsyn, Jánibek!
