Serik Jumanǵarın atap ótkendeı, bıyl forýmǵa 20 jyl tolyp otyr.
«Forýmda biz birinshi kezekte eki eldiń turǵyndary men bıznes ókilderiniń túıtkildi máselelerin talqylaımyz. Bul forýmda aýyl sharýashylyǵy máselesine úlken mán berilip otyr. Máselen, aýyl sharýashylyǵyn sıfrlandyrý, aýyl sharýashylyǵyndaǵy jastardy qoldaý jaıynda sóz qozǵalady. Sondyqtan bul jerde qandaı saıasat bolýy múmkin? Biz tek ekonomıkalyq jáne saýda qarym-qatynastary máselelerin talqylaıtyn bolamyz. Sarapshylar, aımaq basshylary keledi, óńiraralyq kelisimderge qol qoıylady. Eń aldymen saýda-ekonomıkalyq kelisimderge qol qoıylady. Bul eki elge tıimdi bolady dep oılaımyn», dedi Premer-mınıstrdiń orynbasary.
Jumanǵarınniń aıtýynsha, Reseı Qazaqstannyń eń iri saýda seriktesi bolyp qala beredi. Bul elmen taýar aınalymy búginde 27 mıllıard dollarǵa jetti.
«О́tken jyly eksport 9 mıllıardty qurasa, bıylǵy jyly biz eksportta ósemiz, bul jaǵynan da jaqsy jumys istep jatyrmyz», dep qosty Serik Jumanǵarın.
Buǵan deıin Reseı prezıdenti Vladımır Pýtınniń Qazaqstanǵa jumys saparymen keletinin jazǵan edik. Sapar barysynda eki el basshylarynyń kelissózderi josparlanǵan, onyń barysynda Qazaqstan-Reseı strategııalyq seriktestiginiń ózekti máseleleri talqylanady. Sonymen qatar prezıdentter beınekonferensııa arqyly Qostanaıda ótetin Qazaqstan men Reseıdiń 19-shy óńiraralyq yntymaqtastyǵy forýmyna qatysady.
