– «Jamby atý» ulttyq oıynymyzda jylqymen óner kórsetiletinin bilemiz, al túıe ústinde otyryp jamby atý degendi buryn-sońdy estimeppiz, mundaı ıdeıa qalaı, qashan týdy?
– Negizi bizdiń ultymyzda «uıat bolady», «buryn eshkim istemegen» degen sekildi komplekster bar, alaıda, buryn jasalmaǵandy jasaýǵa bolady ǵoı. Ideıa basymyzǵa osydan eki jyl buryn kelgen. Biraq, yńǵaıy kelmedi, naqty aıtqanda túıe tappadyq. Sodan sonaý Shymkent jaqtaǵy Sozaqtan úsh jasar qazaqy eki túıe satyp aldyq. Úıretilmegen asaý túıeni úırettik, «bylaısha aıtqanda nólden bastadyq». Odan keıin túıe úrikpesin dep áýeli shybyqpen-aǵashpen sadaq atyp jatqan sekildi jaǵdaılarǵa túıeni úıretip, sodan keıin ǵana baryp, sadaqpen atýdy bastadyq, jambyny jylqy ústinde ózimiz de atyp júrmiz ǵoı, al túıemen sekýndyna deıin eseptep arnaıy jattyǵyp júrdik, úsh jarym aı ýaqytymyz ketti.
– Rekordtyq isti júzege asyrýdaǵy maqsatyńyz qandaı boldy jáne ózgeshe rekord ornatqan shákirtińiz týraly aıta ketseńiz.
– Almaty qalasy turǵyndaryna túıe tańsyq, onyń ústine bir jaǵynan jastardy tańǵaldyrý úshin, al eń bastysy ulttyq oıynymyzdy jańasha mazmunmen tolyqtyrý maqsatynda atalǵan isti júzege asyrdyq. Qazaqstanda tuńǵysh ret túıeniń ústinde otyryp 100 metrdi 12 sekýndta baǵyndyryp, araqashyqtyǵy 30 metr bolatyn 3 nysanany kózdep jamby (sadaq) atyp, osy jylǵy 4 qazanda rekord ornatqan Arýjan Amangeldiqyzy Topjarǵan etno-mádenı ortalyǵynda jumys isteıdi, qazir jasy 18-de. Ol 5 jasynan bastap at qulaǵynda oınap ósken, Jambyl oblysyna qarasty Merkiniń týmasy. Aldaǵy ýaqytta Topjarǵan etno-mádenı ortalyǵynyń tyń josparlary bar, ýaqyty kelgende júzege asyramyz degen oıdamyz.
