«Kez kelgen qaıshylyqty BUU Jarǵysynyń normalary men qaǵıdattaryna saı sheshýge bolatynyna kámil senemin. Bul qujatty álemdik qoǵamdastyq adamzat tarıhyndaǵy eń qanquıly soǵystan keıin qabyldady. Mundaı qasiret endi qaıtalanbaýy úshin halyqaralyq arenada bárine túsinikti, ortaq oıyn erejesi qabyldandy. Bul izgilik pen adamgershilik qaǵıdattarynyń zor jeńisi edi. Ázirge álem qaqtyǵystardy eńserýdiń budan artyq tásilin oılap tapqan joq», dedi Prezıdent.
Prezıdenttiń aıtýynsha, jer kólemi, qýaty men ekonomıkalyq áleýetine qaramastan, barlyq memleket teń.
«Halyqaralyq quqyq eshqandaı bura tartýsyz, teńdeı jáne bárine birdeı qoldanylady. Sondyqtan ashýdy aqylǵa jeńdirip, halyqaralyq quqyq normalaryn múltiksiz saqtaǵan sátten bastap, álemde tepe-teńdik qaıta ornaıdy dep sanaımyn. Bul formýla saıası júıeler úshin de, qazirgi zamandaǵy ekonomıkalyq, ekologııalyq jáne gýmanıtarlyq máselelerdi sheshýde de ózektiligin joımaıdy», deıdi el Prezıdenti.
Memleket basshysy biz buryn-sońdy bolmaǵan geosaıası bólshektený jáne áleýmettik-ekonomıkalyq turǵydan jikke bóliný jaǵdaıyna kýá bolyp otyrǵanymyzdy atap ótti.
«Saıasat pen ekonomıkada jahandyq jáne aımaqtyq deńgeıde ózgerister júrip jatyr. Bul memleketter men qurlyqtardyń qaýipsizdigine alańdaýshylyq týǵyzady. Úılesimdi álemdik ekonomıka qurý úshin Jahandyq Ońtústik jáne Jahandyq Soltústik elderi ózara senimge, bir-biriniń múddesin qurmetteýge, sondaı-aq kópjaqty yntymaqtastyq qaǵıdattaryna negizdelgen ortaq mámilege kelýi kerek. Osyndaı kúrdeli úderiste BUU mańyzdy ról atqarýǵa tıis. Qazirgi tańda ol barlyq adamzatty biriktiretin balamasy joq jalǵyz jahandyq uıym sanalady», dedi Q.Toqaev.
