Saýda ornyndaǵy beınebaqylaý qurylǵysy ákimniń: «Meniń artymda turǵan adamdy kórip tursyń ba? Tobyl ákiminiń orynbasary. Maǵan onyń telefon nómirin bershi (Dúken ıesiniń baılanys nómirin surasa kerek). Alty-aq sekýndta qurtamyn ony. Bárin qurtamyn! Meniń múmkindikterimdi bilmeısiń sen! Meniń kim ekenimdi bilesiń be?», dep ákireńdep turǵan sátin jazyp alǵan. Kamerada odan keıin dúkenshiniń ákimge ishimdik satqany, ákimniń dúkenshiniń aldyna shıyryp aqsha laqtyrǵany, qaıtqan tıyn-tebenin qaltasyna salyp jatyp, túsiniksiz taǵy birdeńe aıtqany, satýshynyń «Menimen bulaı dóreki sóılespeńiz!» degen sózderi saqtalǵan.
Atalǵan departamentke qarasty memlekettik qyzmet salasyndaǵy baqylaý basqarmasynyń basshysy Azamat Baıtursynov qyzmettik tekseris barysynda M.Taımasovtyń óz aıybyn moıyndap, shyn ókinish bildirgenin, al dúken dırektorynyń keleńsiz oqıǵaǵa qatysty qandaı da bir túsinik berýden bas tartqanyn málimdedi.
– Zań tyıym salǵan ýaqytqa qaramastan, M.Taımasov ishimdik satyp alýǵa tyrysqan. Bul keleńsiz oqıǵa áleýmettik jeli arqyly búkil elge tarap ketti. Satýshy araq berýden bas tartqan. Al aýzynan aq ıt kirip, kók ıt shyqqan ákim qoqan-loqy kórsetip, dúken ıesine qońyraý shalǵan. Osydan keıin áleýmettik jelide memlekettik apparattyń bedeline nuqsan keltiretin pikirler kóbeıdi, – dedi A.Baıtursynov.
Maqash Taımasovtyń memlekettik qyzmet salasynda júrgenine 5 jyl 6 aı bolypty. 2022 jyldyń 20 aqpanynda Novoılın aýyldyq okrýginiń ákimi bolyp saılanǵan. Buryn-sońdy tártiptik jazaǵa tartylmaǵan, ózine senip tapsyrylǵan mindetin de jaqsy atqaryp kelgen kórinedi.
«Dúkenge 18 qazanda bardym. Ishimdik satyp alǵym kelgen. Biraq saǵatqa qaramappyn. Meni burynan jaqtyrmaı júrgen satýshymen janjaldasyp qaldym. Ol meniń ótinishime dóreki jaýap qatty, sol sátte óz-ózime ıe bola almaı qalyp, balaǵat sóz aıtyp qoıdym. Dúkenge kirmeı turyp, kóliktiń ishinde áıelimmen ursysyp qalyp, kóńil kúıim bolmaı turǵan. Bul áreketime shyn ókinip, keshirim suraımyn. Buryn-sońdy mundaı jaǵymsyz qylyq jasap kórgen emespin. Sondyqtan keńes músheleri, ádil sheshim shyǵararsyzdar degen úmittemin», dedi M.Taımasov.
Aýyl ákimi buǵan deıin sot beınejazbany qarap shyqqan soń, satýshynyń dóreki jaýabyn eskerip, ózine salynǵan ákimshilik aıyppul mólsherin azaıtqanyn aıtty.
Keńes músheleri ákimniń dúkenshi áıel ózin qalaı jábirlegenin, qaı sózi janyna tıip ketkenin naqtylap aıtyp berýin suraǵan edi, M.Taımasov: «Múmkin onyń úzildi-kesildi «Joq» degeni dál sol kezde maǵan jábirlep turǵan sııaqty bolyp kóringen shyǵar», dep jaýap berdi.
– Meni ákimniń óz aıybyn satýshynyń dóreki sózi arqyly aqtap alǵysy kelip turǵany tańǵaldyrady. Shynaıy ókinip turǵan adamdy kórip turǵan joqpyn. Tek aqtalý úshin bar aıypty basqaǵa jabýǵa tyrysyp jatyr. Beınejazbany birneshe ret bastan-aıaq qarap shyqtym. Dúkenshiniń dóreki sóılegenin baıqamadym. Qaıta ol óz-ózin sabyrǵa jeńdirip, baıypty ustap tur. Al Taımasovtyń kóńildi ekeni, serigimen birge kúlgeni anyq baıqalady. Áıelimmen ursysyp qalyp edim degen jaı oıdan shyǵarylǵan syltaý dep esepteımin. Sondyqtan ákimge eń qatal shara qoldaný kerek, – dedi keńes múshesi Asqar Jabaev.
Tártiptik otyrysqa qatysqandardyń deni osyǵan uqsas pikir aıtty. Nátıjesinde, Ádep keńesiniń músheleri biraýyzdan aýyldyq okrýg ákimin laýazymynan bosatý týraly sheshim shyǵardy.
Qostanaı oblysy
