Baıqaý sharty boıynsha úzdik oqyrman oqýshylarǵa sporttyq velosıped, planshet jáne taǵy basqa baǵaly syılyqtar beriledi. Jobaǵa jeke kásipkerler demeýshilik jasaýda. Mektep dırektory Ýbaıdýlla Eralıevtiń aıtýynsha, ıgi jobaǵa jastar arasynda qyzyǵýshylyq artyp keledi eken. «Mektebimizde mundaı aksııa alǵash ret uıymdastyrylyp otyr. Kitap oqýǵa, bilimin, dúnıetanymyn keńeıtýge qushtar bala velosıpedti basty maqsat etpeýi de múmkin. Degenmen velosıpedti kórip kitap oqýǵa degen qyzyǵýshylyǵy arta túsetin balalardyń qatary kóbeıedi degen oıdamyz», deıdi mektep dırektory. Mundaı aksııa buǵan deıin aýdandaǵy taǵy bir mektepte uıymdastyrylǵan eken. Nátıjesinde, jastardy kitap oqýǵa baýlýda osyndaı jobalardyń alar orny erekshe ekeni ańǵarylǵan.
Sondaı-aq kitaphanashylar el tarıhyn bilýge, dana Abaıdyń shyǵarmalaryn oqýǵa qyzyǵatyndar kóp ekenin aıtady. Bul oraıda kóne kitaptardyń alar orny erekshe. Mysaly, №25 S.Seıfýllın atyndaǵy jalpy orta bilim beretin mektep kitaphanasynda 1957 jyly Almaty qalasyndaǵy Qazaqtyń memlekettik kórkem ádebıet baspasynan basyp shyǵarylǵan Abaı Qunanbaıulynyń eki tomdyq shyǵarmalar jınaǵy saqtalǵan. Bul – mektep kitaphanasyndaǵy kóne ári qundy kitaptardyń biri. Mektep kitaphanashysy Gúlmıra Turysbekovanyń aıtýynsha, kitap 66 jyldan beri saqtaýly. «Mektebimizdiń kitaphanasynda jalpy 15 351 kitap bar. Sonyń ishinde eń kóne kitap – 1957 jyly basylyp shyqqan Abaı Qunanbaıulynyń shyǵarmalar jınaǵy suranysqa ıe bolyp tur. Mundaı jádigerlerdi biz kózdiń qarashyǵyndaı saqtaımyz», deıdi Gúlmıra Turysbekova. Mektep kitaphanasynda oqýshylardyń kitap oqýyna barlyq jaǵdaı jasalǵan.
Túrkistan oblysy
