Ataýly kún ártúrli elderde metrologııalyq standarttardyń birligin qamtamasyz etýge baǵyttalǵan. Sondaı-aq álemdegi qoldanystaǵy eń eski halyqaralyq sharttardyń biri sanalatyn 1875 jylǵy Parıj Metr konvensııasynyń qabyldanýyna arnalǵan.
Komıssııa otyrysynda sóz sóılegen Qazaqstannyń IýNESKO janyndaǵy Turaqty ókili Asqar Abdrahmanov uıymǵa múshe memleketterge osy bastamany qoldaǵandary úshin rızashylyǵyn bildirdi.
Onyń aıtýynsha, Metrologtar qaýymdastyǵynyń kásibı merekesine BUU deńgeıinde halyqaralyq mártebe berý búkil álemdegi adamdardyń kúndelikti ómirine kóp jaǵdaıda kórinbese de is júzinde zor yqpal etetin osy mańyzdy ǵylym salasynyń joǵary bedelin odan ári nyǵaıtady degen túsinikke súıene otyryp, Qazaqstan osyndaı qararǵa bastamashylyq etken.
«Biz Qazaqstanda bıyl elimizdegi alǵashqy metrologııalyq mekemeniń 100 jyldyǵyn atap ótken jáne osy ǵylymdy ulttyq, óńirlik jáne jahandyq deńgeıde damytýǵa óziniń laıyqty úlesin qosyp kele jatqan metrologtardyń myqty kásibı qoǵamdastyǵynyń belsendiligin maqtan tutamyz», dep atap ótti otandyq dıplomat.
Uıymǵa múshe 43 memleket elimiz bastamashylyq etken qarardyń birlesken avtory atandy.
Halyqaralyq metrologııalyq qoǵamdastyq atynan otyrysta Dúnıejúzilik salmaq jáne ólshem bıýrosynyń dırektory Martın Mılton sóz sóılep, Qazaqstan men IýNESKO-ǵa múshe memleketterge 2025 jyly Metr konvensııasynyń 150 jyldyǵyn merekeleý qarsańynda metrologııany damytýdyń mańyzdylyǵyna búkil álemde qosymsha nazar aýdarýǵa múmkindik beretin qundy bastamasy men qabyldanǵan sheshimi úshin alǵys bildirdi.
