Ál-Farabı atyndaǵy QazUÝ basqarma múshesi – ǵylymı-ınnovasııalyq qyzmet jónindegi prorektory Jamıla Aıtjanovanyń aıtýynsha, bıyl 2 qarashada Memleket basshysy Qasym-Jomart Toqaev elimizge resmı saparmen kelgen Majarstan Premer-mınıstri Vıktor Orbanmen kezdesti. Kezdesýde mańyzdy kelisimderge qol qoıyldy. Kelisimge sáıkes «Globalia» kompanııasy Qazaqstannyń birneshe óńirinde kún energııasy stansalaryn salatyn bolady. Qazirgi kezde Gabor Shagıdiń basshylyǵymen Qazaqstanda «Kún parkteri», «Kásip jáne IT-konsaltıng», «Banktik súıemeldeý» jáne basqa da birqatar joba júzege asyp keledi.
Professor Gabor Shagı Qazaqstannyń jetekshi joǵary oqý ornymen yntymaqtastyq ornatýǵa qyzyǵýshylyq tanytty. Professor turaqty damý maqsattarynyń kún tártibi turǵysynan ózekti bolyp otyrǵan jańartylatyn energetıkany ıntegrasııalaý máselesiniń ózekti ekenin alǵa tartty. Onyń aıtýynsha,«Globalia» kompanııasy Qazaqstan aýmaǵynda kóptegen jobalardy júzege asyryp keledi. Byltyr maýsym aıynda Globalia Kft. Qazaqstanda «Astana» HQO aýmaǵynda qorshaǵan ortany qorǵaýǵa baılanysty qyzmetter kórsetetin KAZ global Ltd kompanııasynyń keńsesin ashqan bolatyn. Al Atyraý oblysynda jańartylatyn energetıkany damytýdyń keshendi óńirlik baǵdarlamasy engizildi. 1200 turǵyny bar eldi mekenderdi elektrmen jabdyqtaýdy Aral rejiminde kún batareıalary parki qamtamasyz etedi. Sondaı-aq ol Kıoto hattamasyn ratıfıkasııalaý barysynda Qazaqstan jańartylatyn energııa kózderi esebinen eldiń elektr energııasynyń edáýir úlesin óndirý boıynsha mańyzdy mindet alǵanyn atap ótti. Alǵa qoıylǵan maqsattarǵa súıene otyryp, Qazaqstan 2030 jylǵa qaraı jańartylatyn energııa kózderi esebinen elektr energııasyn óndirýdiń 30 paıyzyna qol jetkizýge nıetti. «2050 jylǵa qaraı bul kórsetkish 50 paıyzǵa jetýi tıis. Qazaqstan paıdaly qazbalarǵa baı el ǵana emes, sonymen qatar kún energııasynyń kómegimen elektr energııasyn óndirý úshin aıtarlyqtaı áleýetke ıe. Geografııalyq jáne ekologııalyq jaǵdaılarǵa súıene otyryp, Qazaqstan ekonomıkasynda, onyń energetıkalyq sektorynda mańyzdy ról atqara alatyn kún energııasynyń áleýeti keń, biraq áli de durys paıdalanylmaǵan tustary bar», dedi professor Gabor Shagı.
Sonymen birge ol energetıka sektoryna keri áser etetin jáne jańartylatyn energııa kózderinen elektr energııasyn óndiretin qýattardyń dınamıkalyq taralýyna kedergi keltiretin negizgi máselelerdi atap ótti. Sondyqtan Qazaqstan jańartylatyn energııa kózderin barynsha paıdalanýy kerek, sondaı-aq memleket bıýdjetine túsetin júktemeni, syrtqy tasymaldaýshylarǵa táýeldilikti azaıtyp, energetıkalyq qaýipsizdigin arttyra otyryp, óńirde kóshbasshylyq rólge ıe bolýy tıis.
ALMATY
