Ár sáttiń ádemi kórinisin máńgilik tarıhqa taspalaǵan ol qala peızajdaryn túsirgendi jany súıetinin aıtady. Tańdaýly týyndylary Eýropa men Azııadaǵy úzdik kórmelerge qoıylǵan Ion Sýn almatylyq kórermenge óziniń jan dúnıesiniń tazalyǵy men tabıǵatpen etene jaqyndyǵyn kórsetetin eń tańdaýly 20 fotosýretin usyndy. Sonymen birge «Ýaqyttan tys. Emosııalar men ekpinder» atty toptyq kórmede erekshe oryndar men nysandardy beıneleıtin 3 týyndysy qoıylǵan.
Ol óziniń fotosýretteri arqyly álemniń eń erekshe elderine saıahattaýǵa baǵyt-baǵdar silteıdi. Sebebi onyń bul ónerdi janyna serik etýiniń ózindik tarıhy bar. Ol Koreıa Respýblıkasynda qaterli isikke eń jaqsy kómek kórsetetin aýrýhanalardyń birinde dáriger bolyp jumys istepti. Keıinnen emdeý ortalyǵynyń jetekshisi bola júrip, naýqastardy tolyqqandy emdeýde ónerdiń qudireti aýrýdyń kúsh-qýatyn tolyqtyrýǵa kómektesedi degen oımen sýretke túsire bastaǵan.
«Men pasıentterge jaılylyq pen psıhologııalyq turaqtylyq syılaý úshin shyn júrekten jumys isteýge tyrystym. Jasandy zattardan qashyp, tabıǵattyń erekshe beınelerin sýretke túsirip, onyń keremetteri men qundylyqtaryn kórsetýdi kózdedim. Gıppokrattyń: «О́mir qysqa, óner uzaq» degen sózi ómirlik ustanymyma aınaldy. Bolashaqta adamzatqa sapaly týyndylar qaldyryp, álem jastary úshin kórkem galereıalar qurýdy armandaımyn. Sonymen qatar halyqaralyq ýnıversıtet qurýdy jáne muqtaj adamdarǵa kómektesetin kóshbasshylardy tárbıeleýdi maqsat tutam», deıdi Ion Sýn Sý.
Ion Sýn Sýdyń beıneleý óneri fotosýreti búkil álemde moıyndaldy. Onyń sýretteri «Zamanaýı ataqty sheberler» jáne «Italııadaǵy beıneleý óneriniń keıipkerleri» kitaptarynyń 5 tomynda kórsetilgen.
ALMATY
