Issapar aıasynda Prezıdent Is Basqarmasy Medısınalyq ortalyǵynyń ókilderi Mańǵystaýdaǵy oblystyq onkologııalyq dıspanser qyzmetimen tanysty. Aýrýhana basshysy medısınalyq mekeme qyzmetiniń strategııalyq baǵyttary týraly baıandady, qonaq dárigerler óńirdegi áriptesterimen medısına salasyndaǵy tájirıbelerin bólisti. PIB Medısınalyq ortalyǵynyń basshysy Alekseı Soı aýrýhanany aralap, KT, MRT, ÝDZ, mammografııa, endoskopııa kabınetterine, sondaı-aq operasııalyq bloktarǵa, hırýrgııa jáne reanımasııa bólimshelerine baryp, dárigerlermen kezdesti.
Sondaı-aq osy oraıda Mańǵystaý oblystyq aýrýhanasynda jańa bólimshe – oblystyq kópsalaly aýrýhanada gospıtaldyq farmasııa jumysyn uıymdastyrý máseleleri talqylandy. Gospıtaldyq farmasııa – dári-dármekterdi basqarýdyń pasıentke baǵyttalǵan jáne jekelendirilgen modeli. Mamandar dári-dármek aınalymyna qatysty aýrýhananyń barlyq jaǵdaıyn zerttep, basqarýdyń jańa úlgisin usyndy. Oryn tańdaýǵa qatysty máseleler pysyqtalyp, shemasy sharýashylyq qyzmetimen, jeldetý qyzmeti jáne Tótenshe jaǵdaılar departamentimen kelisildi. Jańa bólimniń jumys erejeleri, negizgi maqsattary, shtat sany ázirlenip, qajetti qural-jabdyqtardyń tizimi daıyndaldy. Qyzmetkerlerdi aqparattandyrý jáne laýazymdyq mindetterin naqtylaý boıynsha jumystar júrgizildi. Aldaǵy ýaqytta jumysty onlaın rejimde baqylaý josparlanyp otyr. Qajet bolǵan jaǵdaıda qajetti mamandar shaqyrylady.
– Biz aýrýhana basshylyǵymen jańa bólimsheniń jumysyn uıymdastyrýǵa qatysty barlyq qajetti máseleni talqyladyq. Jansaqtaý bólimine, operasııalyq bólimge, hırýrgııa, kardıohırýrgııa bólimine bardym, dıalız bóliminde boldym. Dárihana tekserilip, osy salany jańartý boıynsha usynystar berildi. Sondaı-aq hırýrgııa bólimshesin medısınalyq maqsattaǵy buıymdarmen jáne dári-dármektermen qamtamasyz etýdi jaqsartý jobasy usynyldy, – deıdi Ulttyq neırohırýrgııa ortalyǵy gospıtaldyq farmasııa bóliminiń basshysy A.Tólepbergenova.
Tórt kúnge sozylǵan issapar aıasynda neırohırýrg, ýrolog, travmatolog sııaqty 28 jetekshi mamannan quralǵan dárigerler toby Mańǵystaý oblystyq kópsalaly aýrýhanasynda praktıkalyq jáne konsýltasııalyq-ádistemelik kómek kórsetip, tórt kún ishinde dárigerler 60-tan asa turǵynǵa keńes berip, onnan asa kúrdeli operasııa jasady. Olar sondaı-aq medısınalyq mekemelerdiń 200-den asa qatysýshylaryna praktıkalyq sabaqtar, sheberlik sabaqtary, prezentasııalar men dárister ótkizdi.
Issapar Mańǵystaý oblysynyń ákimi N.Noǵaevpen Prezıdenti Is Basqarmasy Medısınalyq ortalyǵynyń basshysy Alekseı Soıdyń Yntymaqtastyq týraly memorandýmǵa qol qoıýymen qorytyndylandy. Kelisim qala turǵyndaryna dárigerlerdiń tegin konsýltasııalaryn, sanatorıılik-kýrorttyq emdeý jáne medısınalyq ońaltý boıynsha qyzmetterdi alýǵa, qajet bolǵanda jaǵdaıda aýyr naýqastardy emdeýge múmkindik beredi. Sondaı-aq ortaq kelisim nátıjesinde óńirdiń medısınalyq mekeme qyzmetkerlerin oqytý, aýrýlardyń aldyn alý, dıagnostıkalaý, jańa medısınalyq tehnologııalar men ınnovasııalyq ádistemelerin damytý salasynda tájirıbe almasý týraly kelisimge qol jetkizildi.
PIB Medısınalyq ortalyǵynyń basshysy mundaı is-sharalar jergilikti aýrýhanalar mamandarynyń biliktilik deńgeıin arttyrýǵa kómektesetinin, al óńir azamattary úshin qoljetimdi ári sapaly medısınalyq kómek alýyna múmkindik beretinin atap ótti.
– Medısınalyq ortalyq qyzmetiniń aıasynda bilim berý, ǵylymı zertteýler, sanıtarııalyq-epıdemııalyq zertteýler júrgizý, sondaı-aq densaýlyq saqtaý salasynda ınnovasııalyq ádisterdi izdeý jáne engizý sııaqty túrli jobalar iske asyrylyp jatyr. Búgingi qol qoıylǵan memorandým sheńberinde oblys ákimdigimen birlesip, jol kartasy ázirlenedi. Onyń negizinde biz birneshe jyl boıy óńirde densaýlyq saqtaýdy damytý boıynsha belgilengen josparlardy iske asyramyz, – dedi A.Soı.
Mańǵystaý oblysynyń ákimi N.Noǵaev memorandýmnyń aldaǵy ýaqytta óńirdegi medısına salasynyń damýyna aıtarlyqtaı yqpal etetinine senim bildirdi.
– Prezıdent Is Basqarmasy Medısınalyq ortalyǵynan kelgen basshylyq quram jáne hırýrg dárigerler, Mańǵystaý oblysyna kelip, turǵyndarǵa konsýltatıvti-dıagnostıkalyq kómek kórsetip, joǵary deńgeıdegi operasııalardy jasap, kómeý kórsetip jatqandaryńyzǵa úlken alǵys bildiremiz. Ult densaýlyǵy – ulttyq damýdyń basty qundylyǵy. Búginde elimizde densaýlyq saqtaý salasyn damytýǵa erekshe kóńil bólinip keledi. Memleket basshysy Qasym-Jomart Toqaev ótken jylǵy Joldaýynda densaýlyq saqtaý júıesiniń tıimdiligin arttyrýǵa erekshe nazar aýdardy. Soǵan sáıkes, Mańǵystaý oblysynda da medısınalyq kórsetiletin qyzmetterdiń qoljetimdiligi men sapasy artyp keledi. Búginde oblys turǵyndaryna 16 stasıonarlyq jáne 61 memlekettik ambýlatorııalyq-emhanalyq medısınalyq uıym halyqqa qyzmet kórsetip keledi. О́ńirde 793 myń turǵyn bar, onyń 500 425-i – memlekettik mekemelerge, 292 659-y – jekemenshik mekemelerge tirkelgen. О́ńirimizde áleýmettik mańyzdaǵy aýrýlardyń kórsetkishin tómendetý boıynsha jyldan-jylǵa turaqty oń dınamıka qalyptasyp keledi. Bıyl emdeý mekemeleriniń materıaldyq-tehnıkalyq bazasy 73 paıyzdan 92 paıyzǵa deıin jetti, – dedi oblys ákimi.
N.Noǵaev Prezıdenttiń Mańǵystaý oblysyna issapary kezinde kadr tapshylyǵy máselesine qatysty berilgen tapsyrmalaryn iske asyrý barysynda birqatar jumys atqarylyp jatqanyn atap ótti. Onyń aıtýynsha, mamandar tapshylyǵyn joıý maqsatynda 2023 jylǵa 198 oblys ákimi granty bólindi. Onyń ishinde 68 bakalavrǵa, 97 ınternatýraǵa, rezıdentýraǵa 33 grant bólindi. Jas mamandarǵa birjolǵy áleýmettik kómek kórsetý maqsatynda oblystyq máslıhat sheshimimen jergilikti bıýdjet esebinen 70 mln teńge kóleminde qarajat bólindi. Aýyldyq jerge keletin dáriger mamandarǵa 1,5 mln teńge kóleminde birjolǵy áleýmettik kómek kórsetý josparlanyp otyr.
Mańǵystaý oblysynda medısına salasyn jańǵyrtý tek bólingen qarajat kólemimen, túrli zamanaýı qural-jabdyqtardy alýmen, mamandardyń jetkilikti bolýymen ǵana júzege aspaıdy, dárigerlik qyzmettiń sapasyn kóterý dárigerlerdiń ózine tikeleı baılanysty. Joǵary kásibı bilim men jan-jaqtylyq – eń basty jáne mańyzdy krıterıı. Sondyqtan óz kásibine adal, bilimdi bolýdy ár dáriger ózi nyq ustanym etýi kerek.
Mańǵystaý oblysy
