Premer-mınıstrdiń birinshi orynbasary Roman Sklıar Qazaqstan Úkimetiniń respýblıkanyń ınvestısııalyq tartymdylyǵyn arttyrý jónindegi josparlary jáne memlekettik qoldaýdyń qoljetimdi sharalary týraly aıtyp berdi.
Dóńgelek ústelge qatysýshylar Qazaqstanmen kooperasııany odan ári keńeıtý boıynsha birqatar naqty usynys aıtty. Bul tusta mashına jasaý, taý-ken ónerkásibi, kólik jáne logıstıka, aýyl sharýashylyǵy, medısına, qarjy jáne taǵy basqalary basymdyqqa ıe.
Sonymen qatar bul is-sharaǵa bıylǵy maýsym aıynda qurylǵan birlesken jobalardy qarjylandyrý jáne táýekelderdi hedjerleý jónindegi jumys tobynyń músheleri de qatysty.
«Bizdi «Qazaqstanda nemis sapasyna saı jasalǵan» formýlasy boıynsha ónim shyǵaratyn óndiristerdi qurýdaǵy yntymaqtastyq qyzyqtyryp otyr», dedi R.Sklıar.
Premer-mınıstrdiń birinshi orynbasarynyń aıtýynsha, geosaıası jaǵdaıdaǵy ózgerister men iskerlik ahýaldyń jaqsarýy búginde Qazaqstan men Germanııanyń ózara tıimdi ekonomıkalyq yntymaqtastyǵy úshin jańa múmkindikter ashady.
Oǵan qosa R.Sklıar Germanııanyń jetekshi iskerlik birlestikterimen kelissózder júrgizip, birneshe iri nemis kompanııasymen ekijaqty kezdesýler ótkizdi.
Germanııa ónerkásibi federaldyq odaǵynyń (BDI) basqarma múshesi V. Nıdermarkpen odaqqa qatysýshylardy Qazaqstannyń ındýstrııalyq áleýetin jańǵyrtýǵa jáne arttyrýǵa tartý múmkindikteri talqylandy. Bul – Germanııanyń negizgi ekonomıkalyq qaýymdastyǵy, onyń ishinde 40 salalyq birlestik jáne 8 mıllıonǵa jýyq qyzmetkeri bar 100 myńnan astam kompanııa kiretin úlken uıym.
Germanııa ekonomıkasy Shyǵys komıtetiniń atqarýshy dırektory M.Harmspen kelissóz kezinde Qazaqstan-Germanııa Iskerlik keńesi, Saýda-ekonomıkalyq yntymaqtastyq jónindegi qazaq-nemis úkimetaralyq jumys toby, Birlesken jobalardy qarjylandyrý jáne táýekelderdi hedjerleý jónindegi jumys toby, Berlın eýrazııalyq klýby sııaqty birlesken ınstıtýsıonaldyq dıalog platformalarynyń qyzmetin jetildirý máseleleri qozǵaldy. Germanııa ekonomıkasy Shyǵys komıteti Shyǵys Eýropa men Azııanyń 29 eline qatysty Federaldy Úkimettiń saıasatyn qalyptastyrýǵa qatysady, sondaı-aq biraz el uıymdarynda negizgi seriktes bolyp otyr.
Kompanııa ókilderimen ekijaqty kezdesýler aıasynda Qazaqstanda ınvestısııalyq jobalardy iske asyrýdaǵy yntymaqtastyq múmkindikter týraly usynystar qaraldy. Atap aıtqanda, metallýrgııa, óńdeý jáne taý-ken ónerkásibi, hımııa ónerkásibi, qurylys materıaldaryn óndirý jáne taǵy da basqa salalar boıynsha múmkindikter qaraldy.
«LANXESS AG», «Rain Carbon», «HMS Bergbau AG», «Diehl Stiftung», «G. Zwiehoff GmbH» jáne taǵy da basqa kompanııalardyń basshylyǵymen kelissózder júrgizildi.
Sapar barysynda salalyq mınıstrlikter men ulttyq kompanııalardan qosylǵan delegasııa músheleri ózderiniń jumys baǵyttary boıynsha jeke kezdesýler ótkizdi.
Aıta ketý kerek, Qazaqstan – Germanııanyń óńirdegi jetekshi saýda-ekonomıkalyq seriktesi. Onyń úlesine Germanııanyń Ortalyq Azııa elderimen saýdasynyń barlyq kóleminiń 80%-dan astamy tıesili.
