Kollajdy jasaǵan – Qonysbaı ShEJIMBAI, «EQ»
Ekibastuzdan 55 shaqyrym jerde ornalasqan Besqaýǵa aýylynda turatyn jetkinshektiń joǵalǵany týraly habar alǵash 17 qarasha kúni keshkilik polısııada tirkeledi. Mılananyń anasy ishki ister organdaryna ózi habarlasyp, qyzyn izdep tabýdy ótingen. Bul kúni tek Ekibastuz aýmaǵynda ǵana emes, tutas oblysta dabyl qaǵylyp, polısııanyń jeke quramy men qutqarýshylar izdeýge kiristi. Balanyń joǵalǵany týraly aqparat jergilikti chattar arqyly tarap, izdeýge eriktiler men jeke azamattar da jumyldy. Olardyń sany jeksenbi kúni 400 adamnan asqan.
Anasy polıseılerge aıtqandaı, ol balalaryn jınap, alys fermada mal baǵyp júrgen kúıeýine barmaqshy bolǵanda Mılana úıden qashyp ketken. Sodan qyzyn joǵaltqan-mys. Alaıda tártip saqshylary men eriktiler tóńirektiń bárin túgel tintip, qaramaǵan jerleri joq. Ákesi Aleksandr Kolchın de birdeńeden seziktendi me: «Qyzymdy jer jutyp ketpese, osy ýaqytqa deıin tabylatyndaı boldy ǵoı. Qanshama adam kómektesýge kelip jatyr. Bálkim áldebireýler urlap ketken bolar. Buǵan deıin osyndaı qylyq tanytyp, úıden ketip qalǵany bar edi. Alaıda dál mundaı eki táýlik boıy joǵalyp ketýi múmkin emes», degen edi jeksenbi kúni tańerteńgilik.
Mılanany izdestirý 3 táýlikke jýyq jalǵasty. Biraq izdestirý toptary qyzdy tabýǵa aıǵaq bolatyndaı eshteńege kezige almady. Aqyry polıseıler anasynda bir gáptiń baryn sezdi me, ony qaıta-qaıta jaýapqa tartqan. Jetkinshektiń belgisiz sebeppen joǵalyp ketýiniń mán-jaılary birtindep anyqtalyp, oqıǵanyń jelisi aıqyndala bastady. Nátıjesinde, anasy balasyn óz qolymen óltirgenin moıyndady. Tártip saqshylaryna bergen jaýabynda ol qyzyn baıqamaı qatty soǵyp jibergenin, sonyń saldarynan beıkúná jetkinshektiń til tartpaı ketkenin baıandaǵan. Al aýylda turatyn tanysy Mılananyń múrdesin jasyrýǵa kómektesken.
«Kámeletke tolmaǵan balany óltirdi degen kúdikpen polısııa qyzmetkerleri qylmystyń izin jasyrǵan anasy men onyń tanysyn ustady. Ustalǵandar qylmysyn moıyndady. Adam óltirý faktisi boıynsha Qylmystyq kodekstiń 99-baby 3-bóligi negizinde sotqa deıingi tergeý bastaldy. Qazirgi ýaqytta qajetti tergeý áreketteri júrgizilip jatyr. Oqıǵa ornynda mamandandyrylǵan top jumys isteýde. Pavlodar oblysy polısııa departamentiniń, prokýratýranyń jáne óńir ákimdiginiń basshylyqtary bar», dep málimdedi oblystyq polısııa departamenti bastyǵynyń orynbasary Bolat Nurseıitov.
Jurt arasynda qazirgi ýaqytta Mılananyń anasyna qatysty túrli áńgime jeldeı esip tur. Tanıtyndar onyń psıhıkasynda aqaý bar, ondaı bolmaǵanda óz balasyn óltirýge barmas edi dep aqtaýǵa tyrysady. Endi bireýler qyzy anasynyń áldebir qylyqtaryn ákesine aıtýǵa talpynǵany úshin soqqy alyp, jantásilim etti dep esepteıdi. Baýyr eti balasyn óz qolymen óltirdi degenge kóp adamdardyń sengisi joq. Oqıǵanyń shynaıy sebep-saldaryn aldaǵy ýaqytta polıseıler anyqtaı jatar.
Mılanany izdestirý is-sharalaryna elmen birge jumylǵan oblystyq máslıhat depýtaty Asylbek Týǵanbaı: «Bolǵan oqıǵa qabyrǵamyzdy qaıystyrdy», deıdi. «Besqaýǵa aýylyna baryp, kishkentaı Mılanany izdeý jumystaryna shama-sharqymyzsha atsalysýǵa tyrysqan edik. Amal neshik... Sońy qaıǵyly aıaqtalaryn kim bilgen? О́kinishke qaraı, qoǵamda ishkilikke salynǵan, turmysy tómen otbasylar az emes. Biz osyndaı jaısyz shańyraqtardaǵy balalardyń bolashaǵyna muqııat bolýymyz kerek. Jergilikti atqarýshy bılik, jaýapty mekemeler, mektep, qoǵam ókilderi tarapynan jan-jaqty baqylaýdy kúsheıtken jón. Oblys boıynsha jaısyz ortada tárbıelenip jatqan balalardy anyqtap, arnaıy monıtorıng jasalýǵa tıis. Turmysy tómen otbasylardaǵy balalar men olardyń ata-analaryna qatysty da psıhologııalyq kómekti kúsheıtý qajet dep esepteımin. Qoǵam bolyp osyndaı otbasylarǵa qoldaý kórsetýdiń joldaryn qarastyrǵan jón», deıdi ol.
Dúısenbi kúni Bala quqyqtary jónindegi ýákil Dınara Zákıeva Mılananyń ólimine qatysty pikir bildirdi. Onyń aıtýynsha, bıyl elimizde 25 bala kóz jumsa, onyń 6-aýy jaqyn adamdarynyń qolynan qaza tapqan. «Kisi qolynan mert bolǵan 7 jasar qyz tabyldy. Aldyn ala boljam boıynsha kúdikti retinde ustalǵan balanyń anasy kinásin moıyndady. Bul otbasynyń ózge balalary arnaıy ortalyqqa ornalastyrylady», dep málimdedi D.Zákıeva. Ol mundaı aýyr zardaptar kóbine keleńsizdiktiń, ishimdiktiń, otbasyndaǵy zorlyq-zombylyqtyń saldarynan týyndap jatatynyn aıtady.
Pavlodar oblysy,
Ekibastuz aýyldyq aımaǵy
