Qalalyq sottyń baspasóz qyzmeti habarlaǵandaı, sotta álgi tórt azamattyń isi Qylmystyq kodekstiń 125-babynyń 1, 2, 3-tarmaqtary boıynsha, ıaǵnı «Aldyn ala sóz baılasqan adamdar tobynyń kúsh qoldana otyryp adam urlaýy, ómirine nemese densaýlyǵyna qaýipti kúsh qoldanýy» jáne kodekstiń 191, 194-baptary boıynsha qaralǵan. Qylmystyq tergep-tekserý is-sharalarynyń materıaldaryna súıensek, sottalǵandar ótken jyldyń qarasha aıynda zardap shegýshini urlap áketip, kólik garajyna aparǵan. Ol jerde uryp-soǵyp, kúsh kórsetip: «Páterińdi, avtokóligińdi jáne 2 mln teńgeni bizge bermeseń, ómirińmen qoshtasasyń», dep qorqytqan. Sol kúni qylmystyq oqıǵaǵa qatysqandardyń úsheýi zardap shekken azamattyń áıeline baryp, kúıeýin uryp-soǵý sátinen túsirgen beınejazbany kórsetedi. Sóıtedi de: «Eger páter men avtokólikti, qomaqty mólsherde aqsha bermeseń, jazbany taratamyz», dep qorqytqan. Adam urlaǵan top músheleri álgi beınejazba er azamattyń abyroı-bedeline zor nuqsan keltiredi dep eseptese kerek, eki kúnnen keıin olar jazbany taratpaý úshin tipti 7 mln teńge suraǵan. Bul is boıynsha urlanǵan azamattan bólek taǵy eki adam zardap shekken.
Prokýror sotta barlyq tórt aıyptalýshyny bas bostandyǵynan aıyrýdy surady. Olar óz kinálaryn tolyq moıyndady. Qylmystyq is aýyr qylmystar sanatyna jatatyndyqtan, Qylmystyq kodekste 12 jylǵa deıin bas bostandyǵynan aıyrý kózdelgen. Jasalǵan qylmystyq áreketterdiń barlyǵy zardap shegýshilermen, kýáger azamattarmen, sot saraptamasynyń qorytyndylarymen, ózge de sot aıǵaqtarymen dáleldendi. Jasalǵan barlyq qylmysty esepke ala otyryp, sot aıyptaýshylardyń ekeýin 8 jylǵa kesti. Úshinshi aıyptalýshy 7 jyl 4 aıǵa, tórtinshisi 7 jylǵa bas bostandyǵynan aıyryldy. Sondaı-aq zardap shegýshi qos azamat jalǵan aıǵaqtar bergeni úshin sot olarǵa qatysty jeke qaýly shyǵaryp, qujat Pavlodar oblysynyń prokýratýrasyna jóneltildi.
Pavlodar oblysy,
Aqsý qalasy
