Ashyq derekkóz
Semeı qalasyndaǵy garnızondyq Ofıserler úıinde ótken sharada jas áskerı mamandar oıyn, án, bı arqyly kúzgi merekelik kóńil-kúılerin kóterip, tanystyrylym men sán baıqaýynda synǵa tústi. Naqtylap aıtsaq, ózin tanystyrý, óner saıysy, juptar arasyndaǵy oıyn, suraq-jaýap, ózindik shyǵarmashylyq daıyndyq jáne úı tapsyrmasy sııaqty alty kezeń boıynsha óz múmkindikterin kórsetti.
Áskerı bóliminiń komandıri, podpolkovnık Qanat Tanıbergenovtiń aıtýynsha, jyl saıyn uıymdastyrylatyn baldyń aýqymy da keńeıip keledi.
- Altyn kúz merekesi jyl saıyn uıymdastyrylyp otyr. Mundaǵy basty maqsat – áskerı bólimniń jeke quramy men olardyń otbasylaryna kóterińki kóńil kúı syılaý. Otbasylyq qarym-qatynasty arttyrý. Baıqaýda áskerı qyzmetshiler óz ónerlerimen qatar bilimderin de ortaǵa saldy. Dástúrli sharany aldaǵy ýaqytta da joǵary deńgeıde, jańa formatta ótkizetin bolamyz, - deıdi podpolkovnık Q. Tanıbergenov.
Ádilqazylar qatysýshylardyń óneri men ár kezeń boıynsha jınaǵan upaı sanymen jeńimpazdardy anyqtady. Osylaısha tartysty da kóńildi ótken baıqaýdyń qorytyndysy boıynsha ádil-qazylardyń sheshimimen, Talant Mazaqov pen Ásem Álimbekova kúz hanshaıymy men hanzadasy atandy.
