– Altaıdyń ańyz adamyna aınalǵan Boshaı Kitapbaıuly týraly kóp aıtýǵa bolady. Ol kisimen kóp áńgimelestim. Birde «men jylqyny ǵana emes, adam da tanı bilemin» degeni bar. «Toǵyz tańbaly Naıman» degen kitabyna tilegin jazyp, qolyn qoıyp bergen, – degen qala ákimi Jaqsylyq Omar qalyń shejire kitapty kópshilikke kórsetti.
Iá, jazýy mórdeı Boshaı aqsaqaldyń shejire kitaby kópshiliktiń sóresinde turǵany anyq. Sonymen qatar, shahar basshysy aldaǵy kúnderi qala ishindegi Entýzıast kóshesine Boshaı Kitapbaevtyń aty beriletindigin aıtty. Memorıaldy taqtanyń ashylý saltanatyna qatysqan zııaly qaýym, týys-týǵandary da tilekterin bildirip jatty.
– Eńbek eri, shejireshi Boshaı Kitapbaevty aqtyq saparǵa mádenı oshaqtan emes, osy úıiniń aýlasynan shyǵaryp salǵan edik. Búgingi taqtanyń ashylýy sol bir olqylyqtyń ornyn toltyrmasa da Boshaı aǵamyzdyń arýaǵynyń aldynda ótelgen paryzdardyń biri boldy dep oılaımyn. Endigi kezekte men Katonqaraǵaı aýdanyndaǵy Jańaúlgi aýylyna Boshaı Kitapbaıulynyń atyn berýdi usynar edim. О́ıtkeni bul aýyl ol kisiniń kindik qany tamǵan jeri, – dedi Jazýshylar odaǵy Shyǵys Qazaqstan oblystyq fılıalynyń dırektory Álibek Qańtarbaev.
Osylaısha, jınalǵan jurt Boshaı Kitapbaıuly turǵan úıdiń qabyrǵasyndaǵy taqtadan dara tulǵanyń beınesi men naqyl sózin jadyna toqyp qaıtty. Eski jyldardyń estelikterin aıtyp, aıtýly azamattyń rýhyn shat etti.
О́SKEMEN
