Ǵalymdarǵa grant tabystaldy

Ýnıversıtet ǵylymı jumys nátı­jelerin kommersııalandyrýdy qoldaý maqsatynda «Jana asu» granttaryn bóledi. Bıyl ashyq baıqaýǵa joǵary oqý ornynyń ǵalymdary 50 joba joldaǵan.

– Qazirgi tańda otandyq ǵylym­nyń aldyndaǵy basty másele – ǵalym­dardyń ǵylymı-tehnıkalyq qyzmeti nátıjelerin kommersııalandyrý. Mem­leket basshysy óndiris pen ǵy­lym tyǵyz baılanysta jumys isteýi kere­gin únemi aıtyp keledi. Ǵylymı jetistikterdiń barlyǵy halqymyzdyń ál-aýqatyn, ómir deńgeıin jaqsartýǵa tıis. Sondyqtan biz byltyrdan beri ýnıversıtet ese­binen kommersııalandyrýǵa áleýeti bar ǵylymı jobalar men ıdeıalardy qoldaýǵa baǵyttalǵan «JANA ASU» jobasyn bastadyq. Bıyl granttar sanyn kóbeıttik ári bul dástúrdi bolashaqta jal­ǵastyrýdy josparlap otyrmyz. Ýnıversıtetti ǵylymı-zertteý ýnı­versıtetine aınaldyrý aıasynda iri kompanııalarmen yntymaqtastyqqa jáne qol­danbaly ǵylymdy damytýǵa, sondaı-aq ǵalymdarymyzdyń ǵylymı ázirlemeleriniń nátıjelerin óndiriske engizýge kóp kóńil bólinedi, – dedi ýnıversıtet rektory Erlan Sydyqov.

Memlekettik eltańbanyń avtory, ýnıversıtettegi sáýlet kafedrasynyń oqytýshysy Jandarbek Málibekov ınno­vasııalyq kıiz úıdiń modýldik úlgi­sin jasaýdy josparlap otyr. Ol kún batareıalarymen, baılanyspen, ınternetpen jáne basqa da múmkindiktermen tolyq jabdyqtalady. Ǵalymnyń piki­rinshe, zamanaýı kıiz úı týrıster, aýyl sharýashylyǵy qyzmetkerleri, tó­tenshe jaǵdaı jáne basqa da salanyń qyz­metkerleri arasynda úlken suranysqa ıe bolady. Ásirese tótenshe jaǵdaılarda paıdalanýǵa múmkindik bar.

Kólik-energetıka fakýltetiniń oqy­týshysy Nurjan Bolatov kópqabatty ǵımarattarda qoqysty basqarýdyń ın­novasııalyq júıesin ázirlep jatyr. Ǵalym qaldyqtardy jınaý, su­ryp­taý jáne ǵımarattyń tómengi deńgeıine tasymaldaý úshin qoqys shy­ǵarýdyń demonstrasııalyq modelin qurý­dy jos­parlap otyr. Ǵylymı ıdeıa qal­dyq­tardy suryptaýǵa jáne óndiristik kásip­oryndarda ekinshi márte shıkizat retinde qoldanýǵa múmkindik beredi.

Ýnıversıtet ǵalymy Asyltas Qal­tenova qazaq tilin sheteldikter úshin ba­rynsha qoljetimdi jasaýǵa nıetti. Ol aǵylshyn tilinde sóıleıtinder úshin qazaq tilindegi negizgi dıalogter usynylatyn «Sana» mobıldi qosymshasyn ázirleýge kiristi. Asyltas óz ıdeıasyn ýnıversıtet grantynyń kóme­gimen júzege asyrady.

Jaratylystaný fakýltetiniń oqy­týshysy Qazbek Dúısembaevtyń ekolo­gııalyq jobasy da oqý ordasynyń qar­jylaı granttyq qoldaýyna ıe boldy. Ǵalym alma aǵashtarynyń sańyraýqulaq aýrýlaryn PSR testi arqyly tez ári dál anyqtaýdyń jolyn tapty.

Ǵalym Muratbek Arpabekov pen magıstrant Kárim Mazmanov sıfrlyq mamandardy jumysqa qa­byldaý­dyń ınnovasııalyq platformasyn ázir­ledi. Olar kompanııalardyń kadr­lar­dy irikteý úderisin jeńildetýge jáne jaq­sartýǵa nıetti.

– Bizdiń joba shaǵyn jáne orta bıznesti qoldaýǵa múmkindik beredi. 100-den asa bıznes ókilderiniń arasynda saýaldama júrgizdik. Olarda marketpleıs arqyly kóp mamandarǵa qoljetimdilik bar bolǵanymen, avtomattandyrylǵan jumysqa qabyldaý máseleleri týyndaıdy, mamannyń jumys sapasyn tekserý qarastyrylmaǵan. Biz jasandy ıntellekt kómegimen mamandardyń jumys sapasyn 3 kezeńde tekseretin bolamyz, – deıdi Kárim Mazmanov.

Ýnıversıtettiń aǵa oqytýshysy Nur­zada Amangeldi qazaqsha ym-ıshara tilin tanýdyń alǵashqy avtomatty júıesin qurý boıynsha biregeı jobany jalǵastyrýǵa múmkindik aldy. Joǵary oqý orny ǵalymǵa ekinshi ret aqshalaı grant bóldi. Ǵylymı joba jasandy ıntellektke negizdelgen jáne sóıleý men estý qabileti buzylǵan adamdarǵa baǵyttalǵan. Onyń ǵylymı jobasyn Dúnıejúzilik bank te qoldady.

Aıta keteıik, Eýrazııa ulttyq ýnı­versıteti «Jana asu» ishki grantyn 2022 jyly bekitti. О́tken jyly 4 ǵalym baıqaý jeńimpazy atanyp, grant ıegeri bolǵan edi.