DraperU akselerasııa baǵdarlamasyna 35 elden 100-den astam joba qatysqan. 129 ótinim ishinen Ortalyq Azııadan 12 startap iriktelip, AQSh-taǵy Kremnıı alqabyna jol tartty. Otandastarymyz belgili venchýrlyq ınvestor Tım Dreıper uıymdastyrǵan aýqymdy bıznes trenıngten ótti. Álemniń túkpir-túkpirinen kelgen kásipkerler tórt apta boıy jahandyq tehnologııa mamandarynan sabaq aldy. Sondaı-aq baǵdarlama aıasynda kásipkerler órkenıetten jyraq ómir súrip, tómen temperatýrada shatyrda túnep, batpaqty kólde, sýy sýyq Tynyq muhıtynda júzip, túrli qarý-jaraqtan oq atyp, azyq izdedi. Baǵdarlama Demo Day is-sharasymen aıaqtaldy. Onda TrustMe komandasy baǵdarlamaǵa qatysqan 100 startap ishinen ınvestısııalyq tartymdy sheshim retinde tanyldy. Startaptyń bas dırektory Shyńǵys Dáýletbaevtyń aıtýynsha, mıllıarder Tım Dreıper TrustMe-ge ınvestısııa salýǵa qyzyǵýshylyq tanytqan.
«Biz oǵan prezentasııa jiberdik. Tım Dreıper bizdiń ınvestorymyz bolady dep úmittenemiz. О́ıtkeni bizdiń qundylyqtarymyz uqsas», deıdi TrustMe bas dırektory Shyńǵys Dáýletbaev.
Sondaı-aq úzdik 10 startap qataryna Úndistandaǵy qaterli isikti dıagnostıkalaý jobasy, ortodontııa salasynda tóńkeris jasaıtyn lıvandyq joba, Kanada men Karıb basseıni elderiniń medısınalyq jobalary, Saýd Arabııasy, Ońtústik Koreıa jáne Argentınadaǵy jobalar kirdi.
Otandyq startap DocuSign, AdobeSign jáne DropboxSign sııaqty jahandyq alpaýyttardyń tehnologııalarynan túbegeıli ózgeshe, kelisimshartqa qol qoıýǵa arnalǵan ınnovasııalyq sheshimdi usynady. Kompanııanyń negizin qalaýshy Shyńǵys Dáýletbaevtyń aıtýynsha, TrustMe kelisimsharttardyń shartyn ózi baǵdarlamalaıdy jáne adamı faktordy joıady. Qazirgi ýaqytta TrustContract qyzmetin Qazaqstandaǵy 800-den astam kompanııa paıdalanady. Startap-kompanııa О́zbekstan men AQSh-ta ókildikterin ashyp, alǵashqy sheteldik klıentterine de qyzmet kórsete bastady. Buǵan deıin TrustMe startapy Azııa-Tynyq muhıty aımaǵyndaǵy jobalar arasynan Pákistandaǵy jasandy ıntellekt jobasynan keıin ekinshi oryn alǵan bolatyn.
