Atalǵan júıede kartadan bólek, bıometrııalyq taný múmkindigi de qarastyrylǵan. Bul degenimiz – eger oqýshy qandaı da bir sebeppen kartasyn umytyp ne joǵaltyp alǵan jaǵdaıda, ǵımaratqa bet-júzin taný qurylǵysy arqyly kire alady.
«Bir karta arqyly oqýshy kitaphanadaǵy oqý materıaldaryn alady, mektep ashanasynda tamaq satyp alady, qalalyq avtobýs qyzmetin paıdalanady», dedi oqý-aǵartý vıse-mınıstri Aıbat Ilııasov.
Osy karta men bıometrııa múmkindikteri vıse-premerge kórsetildi. Astanalyq mektepte bastaýysh synyptarda bilim alatyn 900-ge jýyq bala men áleýmettik jaǵynan az qamtylǵan otbasylarda tárbıelenip jatqan 36 oqýshyǵa tegin tamaq qarastyrylǵan. Al karta qoldaný jónindegi málimetter tek ata-analarǵa ǵana qoljetimdi bolady.
«Sıfrlandyrý biz úshin óte mańyzdy. Bul júıeniń ashyqtyǵyn qamtyp, oqýshy men ata-ana úshin yńǵaıly jaǵdaı jasap qana qoımaıdy. Munda balalardyń qaýipsizdigi máselesi de bar», dedi Tamara Dúısenova.
Sonymen qatar mundaı júıeler qanatqaqty rejimde Shymkent qalasynda, Mańǵystaý jáne Aqtóbe oblystaryndaǵy mektepterde jumys istep tur. Oqý-aǵartý mınıstrligi keler jyldan bastap tehnologııany ózge óńirlerde engizýdi josparlap otyr.
