Foto: Senat
Kezdesýdi ashqan Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev naryqty damytý jaǵdaıyndaǵy aýyl sharýashylyǵy kooperatıvteriniń negizgi problemalaryna toqtaldy jáne tek iri sharýashylyqtar ǵana memleketten sýbsıdııa alatynyn, al shaǵyn fermalardyń 3%-y ǵana qoldaý alýǵa múmkindigi bar ekenin atap ótti.
«Aýyl turǵyndary qoıatyn eń mańyzdy suraq – kooperatıv qurýdyń qandaı artyqshylyǵy bar jáne paıdasy nede? Aýyl turǵyndary kóbinese bul suraqtarǵa naqty jaýap ala almaıdy jáne soǵan oraı qandaı da bir sheshim qabyldaı almaıdy. Osynyń ózi qurylǵan kooperatıvterdiń azdyǵyna basty sebep bolýy múmkin. Búgingi kezdesý barysynda osy jáne basqa da ózekti máseleler boıynsha paıdaly usynystar men júıeli oılar talqylanady dep úmittenemiz», dedi Álı Bektaev.
Kezdesýge qatysýshylar otandyq ónimniń básekege qabilettiliginiń tómendigin, kooperatıvti tirkeý kezinde kóptegen qujattar tapsyrý jónindegi talaptar problemasyn jáne «Aýyl sharýashylyǵy kooperasııasy týraly» Qazaqstan Respýblıkasynyń zańyn ózgertý qajettigin talqylady.
Aýyl sharýashylyǵy mınıstriniń orynbasary Azat Sultanov óz sózinde qazirgi ýaqytta aýyl halqynyń tabysyn arttyrý jónindegi «Aýyl amanaty» jobasy iske asyp jatqany týraly aıtty. Árbir aýyldyq okrýgte óndiristik jabdyqtar men materıaldyq-tehnıkalyq resýrstardy óndirý, óńdeý, ótkizý, saqtaý, jabdyqtaýmen aınalysatyn aýyl sharýashylyǵy kooperatıvterin qurý josparlanyp otyrǵany belgili boldy.
Keńeıtilgen otyrysqa sonymen qatar saýda jáne ıntegrasııa mınıstrliginiń ókilderi, «Agrarlyq nesıe korporasııasy» AQ basshylyǵy jáne Mańǵystaý, Túrkistan jáne Abaı oblystarynyń aýyl sharýashylyǵy basqarmalarynyń basshylary qatysty.
