Sýretti túsirgen – Erlan OMAR, «EQ»
Júldegerlerdi marapattaý rásiminde Til saıasaty komıtetiniń tóraǵasy Erbol Tileshov osy baıqaýdyń ótip kele jatqanyna 20 jylǵa jýyq ýaqyt ótkenin, sonyń ishinde BAQ ókilderiniń tilge degen janashyrlyǵy men azamattyq jaýapkershiligin joǵary baǵalap, jyly iltıpatyn jetkizdi. Qazir atalǵan baıqaýǵa tek qazaq tilindegi emes, memlekettik til týraly orys tilinde qalam terbeıtin jýrnalıster de qatysa bastaǵan. Máselen, bıyl baıqaýǵa 64 ótinim arqyly 145 materıal kelip tússe, sonyń 123-i qazaqsha, 17-si orys tilinde bolǵan. Osydan-aq onyń salmaǵy qandaı ekenin bilesiz.
Dástúrli baıqaýǵa Parlament Senatynyń depýtaty Bıbigúl Jeksenbaı, «Qazaq gazetteri» JShS bas dırektory Dıhan Qamzabekuly, jýrnalıst Mahat Sadyq, Qoja Ahmet Iаsaýı atyndaǵy Halyqaralyq qazaq-túrik ýnıversıtetiniń professory Moldııar Ergebekov, Qazaq medıaqaýymdastyǵynyń tóraǵasy Erbol Azanbekov sekildi elimizge belgili azamattar qazylyq etti.
Sonymen «Memlekettik til jáne BAQ-2023» baıqaýynyń Gran-prı júldesi men 1 000 000 teńge sertıfıkaty «Halyq úni» aqparat agenttiginiń tilshisi Aıgerim Taýbaıǵa tabys etildi. Basylym betterinde, sondaı-aq ınternet-resýrstarda jaryq kórgen «Úzdik maqala» atalymynda birinshi oryndy Atyraý oblystyq «Prıkaspııskaıa kommýna» gazetiniń aǵa tilshisi Anjela Lı jeńip alsa, ekinshi oryndy «Qazcontent» El.kz AQ aqparattyq agenttiginiń tilshisi Amangúl Tileı ıemdendi. Úshinshi oryndy Astanadaǵy №38 mektep-lıseıiniń qazaq tili men ádebıeti pániniń muǵalimi Birjan Ahmer men «Qazaq úni» respýblıkalyq qoǵamdyq-saıası gazetiniń redaktory Dostan Eldes ózara bólisti. «Úzdik tele jáne radıobaǵdarlama» atalymynda birinshi oryn «Qazaq radıosynyń» redaktory Azamat Tilepovke buıyrsa, ekinshi oryndy «Jetisý» telearnasynyń qyzmetkeri Murat Jumabaı enshiledi.
Sonymen qatar baıqaý qorytyndysy boıynsha 9 qatysýshy yntalandyrý syılyǵyna ıe boldy. Solardyń ishinde «Egemen Qazaqstan» gazetiniń tilshisi Jadyra Músilim de bar ekenin aıta keteıik.
