Qala ákiminiń orynbasary Abzal Táshimovtiń aıtýynsha, Arqalyq et kombınaty búginge deıin 800-ge jýyq kıik etin qabyldap alǵan. Onyń 398-iniń etke jaramaıtyny anyqtalyp, arnaıy ólekse kómetin jerde joıylǵan.
«Qalǵan 355 bastyń jalpy salmaǵy 11 myń tonnaǵa jýyqtaıdy. Taza et kúıindegi salmaǵy – 6 725 kg. Osynshama et óńdeýge jiberildi. Kásiporyn 1 kg kıik etin jetkizýshiden 315 teńgeden satyp alyp jatyr, ár kıiktiń salmaǵy shamamen 30-35 kg bolady. Eseptep kórsek, bir bas kıiktiń ǵumyry 9 450 myń men 11 025 myń teńgeniń aralyǵynda ǵana eken.
Kásiporyn dırektorynyń orynbasary Sergeı Malovtyń aıtýynsha, kıiktiń eti jalpy et óńdeý salasynda qalyptasqan úrdister sheńberinde óńdeledi.
– Aldymen kıikti bútindeı qabyldap alyp, múshelep tastaımyz. Odan keıin etin súıekten ajyratyp, týraýǵa jiberemiz. Súıek peshte órteledi nemese arnaıy ólekse kómetin orynǵa jóneltiledi. Terisi qazirshe et kombınatynyń aýmaǵynda saqtalady. Kıik terisin kádege asyrý máselesi áli sheshilgen joq. Týralǵan etti qutylarǵa salyp, bir saǵatqa avtoklavqa zalalsyzdandyrýǵa qoıamyz. Konservi osy avtoklavta 120 gradýs ystyqta daıyndalady, – deıdi S.Malov.
Arqalyq et kombınaty barlyǵy 3 myń basqa jýyq kıik qabyldaýdy josparlap otyr. Et óńdeý, konservi shyǵarý óndirisi ettiń kelip túsýine qaraı júredi. Kásiporyn basshylarynyń aıtýynsha, kıik eti qoǵam belsendileriniń, polısııa men volonterlerdiń qatysýymen qabyldanady. Arqalyqta shyǵyp jatqan konserviler aldaǵy ýaqytta oblys kólemindegi ózge qalalarda da satyla bastaýy múmkin.
Qostanaı oblysy
