2008 jyly «Alash amanaty» qoǵamdyq birlestigi janynan qurylǵan ardagerler ansambli keıin horǵa aınalyp, qala turǵyndaryna lezde tanymal boldy. Atalǵan óner ujymy bas shaharda ótetin túrli mádenı is-sharalarǵa belsene qatysady. Ásirese qala mektepteri men joǵary oqý oryndarynda oqýshylarmen, stýdenttermen kezdesip, halqymyzdyń ǵajaıyp baı ónerin nasıhattap júrgenin erekshe aıtýǵa bolady. Bir jaǵynan, «Elorda» halyqtyq ardagerler hory kindik qalamen ǵana shektelmeı, elimizdiń basqa da óńirlerine baryp, óz ónerlerin kórsetip júr. Máselen, Aqmola oblysynyń birneshe aýdanyna baryp, konsert qoıdy. Odan qaldy Shyǵys Qazaqstan oblysyndaǵy tabıǵaty kórkem Katonqaraǵaı aýdanyna gastroldik saparmen baryp, bir apta sol el turǵyndaryna óner kórsetti. Aýdan basshylary da elordadan barǵan ardagerler horyn qushaq jaıa qarsy aldy. 2021 jyly óner ujymyna qazirgi Mádenıet jáne aqparat mınıstrliginiń buıryǵymen «Halyqtyq hor» ataǵy berildi. Muny hor ónerpazdaryna kórsetilgen qurmet dep bilemiz.
Qazirgi tańda hor quramynda muǵalim, dáriger, ınjener, qurylysshy, memlekettik qyzmetker deısiz be, qysqasy, túrli mamandyq ıeleri bar. Olardyń jas mólsheri 65-ten 81 jasqa deıingi aralyqty qamtıdy. Hor ujymynyń negizgi maqsaty – óskeleń urpaqtyń boıyna qazaqtyń áni men kúıin, salt-dástúrin sińirý.
Mereıtoılyq konsert shymyldyǵy «Elorda» halyqtyq ardagerler horynyń ánuranymen ashyldy. Bul týyndynyń sózin Esenbek Sátbaev, mýzykasyn Jeken Teberikov jazǵan. Ásem án hor músheleriniń oryndaýynda tyńdarman júregine birden jol tapty. Sondaı-aq sahnada jeke daýysta Aıgúl Dúısebaeva, Baqytjan Juqataeva, Aqyngúl Álmuqanqyzy, Farıda Aldajanova, Bıbi Qabylshaeva sekildi apalarymyz salǵan ánderdi de jurtshylyq óte jyly qabyldady. Ásirese Bazarbaı Dáneǵulov aǵamyz ult ustazy Ahmet Baıtursynulynyń «Aqqum» ánin zor daýsymen babyna keltirip shyrqaǵanda delebesi qozbaǵan jan qalmady. Esenbek Sátbaev Maılyqojanyń termesimen tyńdarmandardy bir serpiltti. Áıelder vokaldyq tobynyń Shámshi Qaldaıaqov ánderinen oryndalǵan popýrrı de jıylǵan qaýymǵa qatty unady.
Jalpy, «Elorda» halyqtyq ardagerler horynyń músheleri mereıtoılyq konsertke óte tyńǵylyqty daıyndalǵan. Ulttyq kıimderimen atalarymyz ben apalarymyz shyǵa kelgende, sahna ózgeshe túrge bólendi. Bul jerde hor jetekshisi, eńbek ardageri Úmit Dúısenova men hordyń kórkemdik jetekshisi, Mádenıet qaıratkeri Jeken Teberikovtiń eńbegi zor ekenin aıta keteıik. О́ıtkeni hor músheleriniń oryndaǵan shyǵarmalardyń tyńdarmanǵa jetýi, daýystarynyń anyqtyǵy kásibı sheberlerden esh kemdigi joq. Olar ıirimi tereń týyndylardyń ózin tyńdarmanǵa keremet jetkize bildi. Hor ónerpazdarynyń konsertti mýzykasyn kórnekti kompozıtor Eskendir Hasanǵalıev, sózin ataqty aqyn Qadyr Myrza Áli jazǵan «Atameken» ánimen qorytyndylaýy da óte sátti shyqty.
Sondaı-aq kesh aıasynda óner ujymynyń ótken tarıhy, músheleri týraly baıandalǵan «О́nerdi asqaqtatqan «Elorda» halyqtyq hory» atty kitaptyń tusaýy kesildi. Tusaýkeserde sóz alǵan Almaty aýdany ardagerler keńesiniń tóraǵasy Marat Mustafın bul jınaqtyń mazmuny erekshe ekenin atap ótti. Jınaqtyń avtory – ólketanýshy, Ereımentaý aýdanyń qurmetti azamaty Manap Ádireshev.
