Kolleksııada 78 úlgi bar. Olardyń árqaısysyna metallogenııalyq sıpattama jasalǵan shaǵyn kitapsha da kafedra oqytýshylary tarapynan tartý etildi. Ýnıversıtet rektory Meıram Begentaev: «Bul toptamany ult maqtanyshy, Baıanaýyldan shyqqan uly ǵalym, tuńǵysh akademık Qanysh Sátbaev atalaryńyzdan mektep oqýshylaryna syılyq dep qabyldańyzdar» degen sálemin joldady.
Baıanaýyl aýdandyq bilim berý bóliminiń basshysy Mereke Ábdikárimovtiń aıtýynsha, geologııalyq tastardyń arasynda shógindi jynystar, krıstaldar, metamorfty mıneraldy qurylys zattary, mármár, jalpy, elimizde kezdesetin paıdaly qazbalardyń úlgileri bar.
– Mundaı geologııalyq resýrstardyń mol qory bizdiń óńirdegi mektepterde joq. Erekshe qundy syılyq ár oqýshynyń geologııa ǵylymyna degen qyzyǵýshylyǵyn arttyryp, ǵalym atamyz ustaǵan tastardyń qasıeti qabiletterin ushtaıdy degen úmittemiz. Akademıktiń murasyn oqýshylarymyzdyń bilimin arttyrýǵa qoldanamyz. Taý jynystaryn qolmen ustap, kózben kórip, shynaıy sezinýge múmkindik bergen ýnıversıtettegi kafedra ujymyna mektep atynan erekshe alǵys aıtamyz. Endi mektep ustazdary geografııa sabaǵynda taý jynystary, paıdaly qazbalar taqyryptaryn ótkizgende praktıkalyq túrde oqýshylarǵa kórsete alatyny anyq. Ári bul úlgilerdi bıologııa, jaratylystaný, tarıh pánderinde paıdalanýǵa da bolady, – deıdi ol.
Aıtyp óteıik, Qarajar aýylynda bıyl demeýshiler qarajatyna 100 oryndyq zamanaýı mektep salyndy. Keregesi keńeıgen bilim berý uıymynyń ózi endi negizgi mektepten orta bilim berý júıesine aýystyrylady dep kútilip otyr. Al bilim ordasynda búginde 72 oqýshy bilim alyp jatyr.
Pavlodar oblysy,
Baıanaýyl aýdany,
Qarajar aýyly
