Mádenıet oshaǵy qala turǵyndary men qonaqtaryn álemniń ásemdigin pash etetin áserli fotosýrettermen tanystyrdy. Taımas Nurtaev jer sharynyń túkpir-túkpirin aralap, umytylmas saıahattardyń jarqyn estelikterin tarıhqa taspalaǵan.
Sýretshiniń galereıasynda Sahara shóli, álemdegi eń erekshe araldardyń biri – Grenlandııa, tarıhy tereń Italııa, Islandııanyń «muz eli» aıryqsha kórinis tapqan.
Fotoger Qytaı eline sapary barysynda túsirgen Szıýchjaıgoý Ulttyq saıabaǵynyń, Hýanlýng kógildir kólderiniń kórkem peızajdarynyń ortasynda aǵyp jatqan jasyl-sary Lı ózeni, Avatar taýlarynyń fotosýretteri kórermendi birden baýraıdy.
Ol 2017 jyly Shpısbergen aralynan Soltústik endikterge sapary nátıjesinde osy araldyń tańǵajaıyp jáne erekshe tabıǵaty men janýarlar álemin sýretke túsirgen. Onyń obektıvine ilingen aq aıýlar, ıtbalyqtar, morjdar men kıtter janýarlar álemine qyzyǵýshylardyń nazaryn aýdardy.
Fotosýretterdegi Argentına men Brazılııanyń kórkem tabıǵaty, Gaýcho shabandozdary, Tores-del-Paın Ulttyq parki, Greı kóli jáne Paın massıvi tartymdylyǵymen baýraıdy. Avtor Afrıkanyń baı faýnasyn túsirgen álemge áıgili Maasaı Mara ulttyq qoryǵyna da at basyn burǵan. Kamchatkany tikushaqpen aınalyp ótip, áıgili Korıak, Avachınskıı, Kozelskıı janartaýlaryn da sátti taspalaı alǵan.
Kórmeniń erekshe bóligin elimizdiń kórkem tabıǵatyn bederlegen «Qazaqstan tabıǵatynyń marjandary» atty fotojumystar quraıdy. Onda avtor, týǵan ólkesi men Ile Alataýynyń ásem jerlerin, Almaty men Almaty oblysy aýmaǵyn, Kólsaı, Han-Táńiri, Sharyn kóli men Sharyn shatqaly, «Altynemel» Ulttyq qoryǵy, «Baıanaýyl» Ulttyq saıabaǵy, Jasybaı, Marqakól, Býrabaı, Zaısan, Qara-Sý, Qara-Kól, Qaıyńdy, Úlken Almaty ózeni, Buqtyrma sýqoımasy, Kaspıı teńizi, Kıın-Kerish taýlary, Aq-Taý, Shakelmes, Aıǵaıqum, Mańǵyshlaq, Ústirt shatqaly, Shaqpaq paı Saı shatqaly, Úshqońyr jaılaýy, Aqkergeshin, Aqtolaǵaı qyrqasy jáne t.b. túsirgen fotojumystaryn usynǵan.
Taımas Nurtaev Bishkek qalasynda dúnıege kelgen, biraq 60-jyldardyń aıaǵynan bastap Almaty qalasynyń turǵyny. Bilimi boıynsha qurylysshy, biraq fotoónerge degen súıispenshilik onyń ekinshi mamandyǵyna aınalǵan.
