Konserttik baǵdarlamada otandyq kompozıtorlardyń ár býyn ókilderiniń shyǵarmalary usynyldy. Ásirese M.Tólebaevtyń «Qozy Kórpesh – Baıan sulý» operasynan úzindi, sondaı-aq kompozıtordyń «Tos meni, tos», «Kesteli oramal» sekildi tanymal romanstary oryndaldy. A.Jubanov pen L.Hamıdıdiń «Abaı» operasynan «Abaıdyń» arııasy, Á.Qazaqbaevtyń «Jambyl jyraý» operasynan «Súıinbaıdyń» termesi, A.Jaıymov pen A.Jaıymnyń «Beıbarys» operasynan «Beıbarystyń» arııasy, A.Muhıtdınniń «Ál-Farabı» operasynan «Gúlder bıi» shyrqaldy. Sonymen birge V.Strıgoskıı-Paktiń «Kenesary» sımfonııalyq poemasy men B.Qydyrbektiń «Rekvıemi» jáne B.Dáldenbaıdyń «El baqyty» atty vokaldy-sımfonııalyq odasy tartý etildi.
Klassıkalyq mýzyka áýelegen keshte «Astana Operanyń» talantty solısteri – Qazaqstannyń eńbek sińirgen qaıratkerleri Azamat Jyltyrkózov, Janat Shybyqbaev, Meıir Baınesh, «Qurmet» ordeniniń ıegeri Aızada Qaponova, halyqaralyq baıqaýlardyń laýreattary Gúljanat Sapaqova, Mádına Islamova, Beıimbet Tańaryqov, Ramzat Balakıshıev, Erjan Saıpov, Artýr Gabdıev, Altynbek Ábilda, Aıgerim Amanjolova, Narul Toıkenov sekildi ónerpazdar oryndaǵan týyndylar tyńdarmandardy ádemi áserge bóledi. Konsertke arnaıy shaqyrylǵan skrıpkashy Erkebulan Saparbaev pen vokalıst Dılnaz Omarhanovanyń óneri de kórermenderdi tánti etti. Atalǵan óner ordasynyń hory men sımfonııalyq orkestri oryndaǵan shyǵarmalardy jurtshylyq óte jyly qabyldady. Orkestrge Qazaqstannyń eńbek sińirgen qaıratkeri Abzal Muhıtdın men Rýslan Baımýrzın dırıjerlik etti.
Aıta keteıik, óner keshinde sahnada eki birdeı súıekti týyndy tanystyryldy. Onyń biri – talantty jas kompozıtor Álibı Ábdinurovtyń osy konsertke jazǵan orkestr men skrıpkaǵa arnalǵan mýzykalyq shyǵarmasy bolsa, ekinshisi – kompozıtor Serikjan Ábdinurovtyń «Farab-Otyrar» vokaldyq-sımfonııalyq dastany. Eki shyǵarma da shynaıylyǵymen tyńdarmandardyń kóńilinen shyqty.
