Kollajdy jasaǵan – Qonysbaı ShEJIMBAI, «EQ»
Kelisimge qol qoıýǵa baılanysty saltanatty is-shara Astanada Astana International Exchange (AIX) alańynda ótti. Almaty JEO-3-ti qaıta qurý jobasyn qaryzdyq qarjylandyrýdy qamtamasyz etý maqsatymen «Astana» HQO-nyń bırjasynda jalpy nomınaldy kólemi 236,8 mlrd teńgege deıingi turaqty damýǵa baılanysty. AlES-tyń alǵashqy oblıgasııalyq baǵdarlamasy tirkeldi.
«Samuryq-Energo» AQ Ekonomıka jáne qarjy jónindegi basqarýshy dırektory Almasbı Kamalovtyń aıtýynsha, jobany qarjylandyrýdy uıymdastyrý úshin kóp jumys júrgizildi, onyń ishinde halyqaralyq standarttar boıynsha qorshaǵan ortaǵa tıgizetin áserdi baǵalaý jáne álemdik tájirıbelerdi eskere otyryp, qoldanylatyn tehnologııalardy baǵalaý. «Samuryq-Qazyna» AQ men «Samuryq-Energo» AQ Almaty aglomerasııasyn damytýǵa erekshe kóńil bóledi. Almaty JEO-3-ti jańǵyrtýdan basqa, Almaty energııa torabynda óńirdiń energetıkalyq áleýetin kúsheıtip, manevrlik qýat tapshylyǵyn azaıtyp qana qoımaı, qalanyń ekologııasyn jaqsartatyn birqatar mańyzdy joba iske asyrylyp jatyr», dep atap ótti «Samuryq-Energo» AQ ókili.
«Eýrazııa Damý banki Almaty JEO-3-ti qaıta qurý sııaqty mega jobalardy iske asyrýǵa baǵyt ustap otyr. Osy turǵyda biz birneshe mańyzdy aspektini bólip kórsetemiz. Birinshiden, óz resýrsyn sarqyp taýysqan tozyǵy jetken kómir energetıkalyq qazandyqtardyń ornyna tabıǵı gazben janatyn zamanaýı, ekologııalyq taza bý-gaz qondyrǵylaryn ornatý elimizdiń asa iri qalasyndaǵy ekologııalyq jaǵdaıdy aıtarlyqtaı jaqsartady. Bul bank ustanatyn ornyqty damý qaǵıdattaryna tolyq sáıkes keledi. Ekinshiden, Ortalyq Azııadaǵy sý-energetıkalyq keshendi damytý jónindegi bizdiń iri ınvestısııalyq jobamyzdy iske asyrý barysynda Eýrazııa Damý banki elderge energetıkalyq qaýipsizdikke qol jetkizýge belsendi járdemdesip, qarjylandyryp, jobalaý aldyndaǵy jumystarǵa granttar bóledi. Sonymen, biz kapıtal tartýdyń jańa tetikterin ázirleýge belsendi túrde atsalysamyz jáne Sustainability-Linked Bond ornyqty damý oblıgasııalaryn shyǵarýǵa qýana qatysamyz», dep atap ótti EADB basqarma tóraǵasynyń orynbasary Rýslan Dálenov.
AlES ornyqty damý oblıgasııalarynyń debıýttik shyǵarylymy qajetti konsýltasııalyq súıemeldeý sharalaryn atqarǵan AHQO Jasyl qarjy ortalyǵynyń qoldaýymen iske asyryldy, ol oblıgasııalardyń ornyqty damý oblıgasııalary qaǵıdattaryna (Second Party Opinion) sáıkestigi týraly táýelsiz qorytyndy berdi.
AHQO Jasyl qarjy ortalyǵy Dırektorlar keńesiniń tóraǵasy Danııar Kelbetov: «AHQO ekologııalyq ornyqty jobalarǵa ınvestısııalar tartýǵa múmkindik beretin ınnovasııalyq qarjy quraldaryn engizýge beıildi. Osyndaı jańa qarjylyq ónimderdiń biri – ornyqty damýǵa baılanysty oblıgasııalar (Sustainability-linked bonds). Biz búgin Qazaqstannyń Ortalyq Azııada kómirtegi izin tómendetý jónindegi jahandyq maqsattarǵa qol jetkizýge yqpal etetin osy oblıgasııalar naryǵyn birinshi bolyp iske qosqanyna qýanyshtymyz».
EADB-dan bólek, basqa damý ınstıtýttary men ekinshi deńgeıli bankter jobanyń áleýetti ınvestorlary bola alady. Oblıgasııalyq baǵdarlamany shyǵarý jáne ornalastyrý boıynsha qarjylyq keńesshi jáne anderraıter – «Sky Bridge Invest» AQ.
AHQO aqparatyna sáıkes AlES SLB oblıgasııalary Ortalyq Azııadaǵy ornyqty damý oblıgasııalarynyń eń iri shyǵarylymy bolady.
«Keıingi jyldary búkil álemdegi ınvestorlar ınvestısııalyq sheshimder qabyldaý kezinde ESG ólshemsharttarynyń mańyzdylyǵyn kóbirek túsinýde. Nátıjesinde, kóptegen kompanııa ESG-di óz qyzmetine jáne bıznes strategııalaryna engize bastady. AIX qoljetimdi ónimder jelisi arqyly ornyqty damýǵa ınvestısııa salýǵa múmkindik bere otyryp, osy trendke saı bola alǵanyna qýanyshty», dep atap ótti AIX basqarma tóraǵasy Ásel Muqajanova.
«Qýaty 500 MVt bý-gaz qondyrǵysy bazasynda Almaty JEO-3-ti qaıta qurý» ınvestısııalyq jobasyn «Samuryq-Energo» AQ óziniń enshiles uıymy AlES arqyly iske asyrýda. Joba elektr stansasynyń qýaty men manevrlik múmkindikterin arttyra otyryp, ony túbegeıli jańartýdy kózdeıdi. Jańa JEO elektr jáne jylý energııasyn aralas óndiretin bolady. Jobanyń negizgi aspektileriniń biri – stansada eskirgen jáne tozǵan shań-kómir jabdyqtarynyń ornyna tabıǵı gazben jumys isteıtin zamanaýı ekologııalyq taza bý-gaz energııa bloktaryn ornatý.
ALMATY
