Máselen, 12,7 mln ga problemaly jerler boıynsha naqty sheshimder qabyldandy: 2022 jyldyń basynan beri 9,5 mln ga memleket menshigine qaıtaryldy, jer paıdalanýshylar 3,2 mln ga jerdi ıgerýge kiristi.
Aýyl sharýashylyǵy mınıstrligi Jer resýrstaryn basqarý komıtetiniń aýmaqtyq bólimsheleri jer paıdalanýshylarǵa qatysty (jalpy alańy 2,1 mln. ga) jospardan tys 1 174 tekserý júrgizdi. Nátıjesinde:
- jer zańnamasyn buzýshylyqtardy joıý týraly 1,45 mln ga alańǵa 852 uıǵarym shyǵaryldy;
- sot organdarynyń qaraýynda 553,3 myń ga alańda 209 materıal bar.
Sondaı-aq 2022 jyldyń basynan beri 836,5 myń ga aýyl sharýashylyǵy maqsatyndaǵy jerlerdi berý boıynsha ákimdikterdiń 566 zańsyz sheshimi anyqtaldy. Onyń ishinde 153 sheshimniń kúshi joıylsa, qalǵan 413 sheshimniń kúshin joıý boıynsha jumystar júrgizilip jatyr.
Komıssııa otyrysynda jerdi qaıtarý kólemi josparlanǵannan aıtarlyqtaı tómen óńirler tyńdaldy. Bul baǵyttaǵy jumysty kúsheıtý tapsyryldy.
«Memleket basshysy 2023 jyldyń sońyna deıin jalpy aýdany 10 mln gektardy quraıtyn zań buzýshylyqtarmen berilgen nemese paıdalanylmaı jatqan jerler boıynsha naqty sheshimder qabyldaý mindetin qoıdy. Prezıdenttiń tapsyrmasy oryndalýda, onyń 9,5 mln gektary memleket menshigine qaıtaryldy. Sonymen qatar jer paıdalanýshylar qosymsha 3,2 mln gektardy aınalymǵa engizýge májbúr boldy – qazir barlyǵy 12,7 mln gektar jer paıdalanýda. Aldyńǵy qatarly óńirler esebinen nátıjege qol jetkizildi, alaıda belgilengen kórsetkishterden 30%-dan 50%-ǵa deıin artta qalǵan aımaqtar bar. Jumysty kelesi jyly da jalǵastyramyz, biraq biz jerdi ıgerýge basa nazar aýdaramyz. Ol úshin qajetti krıterııler ázirlenetin bolady», dep túıindedi sózin S.Jumanǵarın.
