Bul 15 myńdaı turǵyny bar Jánibek aýdany úshin aq túıeniń qarny jarylǵandaı aqjoltaı habar! О́ıtkeni oblys ortalyǵynan 500 km shalǵaı jatqan aýdan ómir boıy jol azabyn tartyp kele jatqan edi. Ásirese kóktem men kúzgi laısańda jolaýshylar batpaqqa batyp, ara qonyp jetetin. «Jol azaby – kór azaby» degen maqal da dál osy Bókeı ordasy men Jánibek aýdany halqy úshin aıtylǵandaı.
Jańa joldyń tarıhy 2018 jyldan bastalady. Sol kezdegi memleket basshysynyń óńirge sapary kezinde Jánibek pen Bókeı ordasyna baratyn avtomobıl jolyn kúrdeli jóndeýdi tapsyrǵan. Bul 245 shaqyrymdyq jol edi. Sonyń 99 shaqyrymy Jánibek aýdany aýmaǵymen ótetin. Jobalaý-esepteý qujattary daıyn bolǵan soń jol qurylysy 2019 jyly bastalyp ta ketti. Áýelide «2022 jyly bitiremiz» degen jol qurylysy túrli kedergige tap boldy. Qazaqstannyń qıyr shetinde qurylys materıaldary tapshy boldy. Ony jetkizý de ońaı bolmady. Araǵa pandemııa kılikti. Keıbir merdiger óz isine jaýapsyz qarap, sotqa tartyldy. Osylaısha, aýyl halqy alańdaı bastap edi. Alańdamaǵanda qaıtsin, 2019-2022 jyldary – 4 jyl ishinde nebári 124,6 shaqyrym jolǵa asfaltbeton tóseldi.
Kópshilik kópten kútken jolǵa jan bitkeni bıyl ǵana. О́tken jyldyń sońynda oblys basshylyǵyna Narıman Tóreǵalıev kelgende, ońtústik aýdandarǵa aparatyn osy joldy erekshe baqylaýǵa alatynyn aıtqan edi. Sol kúnnen beri osy qurylysty kózimen kórip, jeke baqylaý úshin 8 márte kelip ketipti.
«Men osy jerge sońǵy kelgenimde kópir qurylysy baıaý edi. Sondyqtan merdiger kompanııa basshysymen sóılesip, jumysty barynsha jedeldetýdi tapsyrdym. О́ıtkeni negizgi joldyń qatqyl tabany salynǵanymen, kópir daıyn bolmasa, halyq aınalyp júrem dep qıyndyq kórer edi. «Uniserv» kompanııasyna rahmet, kópir qurylysyn aıaqtady. Endi Jánibek aýdany jolaýshylary jol beınetin kórmeıdi, aınalma jolǵa túspeıdi» deıdi Batys Qazaqstan oblysynyń ákimi Narıman Tóreǵalıev.
Iá, rasynda da bıyl bir jylda aldyńǵy úsh jyldyń kólemindeı is atqarylǵany ras. 1 jeltoqsan kúni Jánibek aýdany aýmaǵyndaǵy joldyń tómengi qabaty tolyqtaı asfalttalyp bitti. Qalyp turǵany sońǵy nysan, 72-shaqyrymdaǵy kópirdiń qurylysy edi. Mine, Jánibek aýdany turǵyndary úshin, oblys úshin úlken tarıhı sát, aıtýly kún jetti. Jańa kópirdiń qurylysy aıaqtalyp, Jánibek-Oral baǵytyndaǵy jol paıdalanýǵa berilip jatyr.
«Bul – bizdiń aýdan turǵyndary úshin úlken qýanysh. Barsha jánibektikter atynan Narıman Tóreǵalıulyna alǵysymyzdy jetkizemiz», deıdi aýdan basshysy Tımýr Shynııazov.
Tımýr Serikulynyń aıtýynsha, Jánibek aýdanynda aýdandyq mańyzy bar avtomobıl joldarynyń jalpy uzyndyǵy 260 shaqyrymdy quraıdy. Sonyń 30 shaqyrymy 2022 jyly jóndelgen. Al bıyl aýdandyq mańyzy bar joldarǵa 40,5 shaqyrym asfalt tóselingen. Osylaısha, jalpy jóndelgen joldyń uzyndyǵy 70,5 shaqyrym bolǵan.
Atap aıtsaq, «Jánibek – Talov – Kishi О́zen» avtomobıl jolynyń 27-33 jáne 33-48 shaqyrym aralyǵy ortasha jóndelgen. Qamysty aýylyna kireberis 14,8 shaqyrym jol kúrdeli jóndeýden ótti. Aqoba aýylyna kireberis joldyń 5,6 shaqyrymyna asfalt tóseldi.
Aýdan basshysynyń aıtýynsha, keler jyly «Jánibek – Talov – Kishi О́zen» avtomobıl jolynyń 92-128 shaqyrymy, Borsy aýyly jolynyń 1 shaqyrymy, Taý aýylyna kireberis 5,7 shaqyrym joldar salyna bastaıdy.
Aýdan ortalyǵyndaǵy aýylishilik joldarda da qarqyndy jumystar júrip jatyr. Bıyl eki kóshege jalpy uzyndyǵy 4 shaqyrym jol tóselgen. Keler jyly 4 kóshede jalpy uzyndyǵy 5,6 shaqyrym aýylishilik jol salynbaq. Osy jumystardyń nátıjesinde aýdan ortalyǵyndaǵy kóshelerdiń 63%-y asfalttalatyn bolady.
«Jol qatynasynyń jaqsarýy jolaýshylar tasymalynyń damýyna jaǵdaı jasaýda. Áleýmettik mańyzy bar №136 «Oral – Jánibek», «Jánibek – Oral» marshrýty kún saıyn turaqty júrip tur. Qazirgi kezde «Qamysty – Taý – Oral» marshrýtyn iske qosý jumystaryn júrgizýdemiz», deıdi aýdan ákimi Tımýr Shynııazov.
Batys Qazaqstan oblysy
