Foto: masa.media
Elimizde jalpy halyqtyq deklarasııa tapsyrý 2021 jyly bastaldy. Bul jyly tabysy men múlki týraly derekterdi depýtat, sheneýnik, memlekettik organda jumys isteıtin azamattar tirkedi. Al bıyl tizimdi kvazımemlekettik sektordaǵy mekeme men bıýdjet qyzmetkerleri, muǵalimder men dárigerler tolyqtyrdy. 2024 jyly bul qatarǵa JK, JShS (IP, TOO) boıynsha qyzmet kórsetetin jeke kásipkerler men olardyń jubaılary qosylady.
Asylynda deklarasııany kezeń-kezeńimen 18 jastan asqan barlyq azamattar, tipti, zeınetkerler de tapsyrýǵa mindetti. Azamattardyń bul sanaty múlki men aktıvteri týraly aqparattardy 2025 jyldan bastap tapsyrady.
Jalpyhalyqtyq deklarasııanyń III kezeńi 2024 jyldyń 1 qańtarynda bastalady. JK, JShS (IP, TOO) ıeleri men olardyń jubaılary jyljymaıtyn múlik, tabys, qolma qol aqshasy týraly aqparatty 2024 jyldyń 15 qyrkúıegine deıin tapsyrý shart. Bul kezeńde 3,9 mıllıon azamat deklarasııa tapsyrady dep boljanyp otyr.
III kezeńde deklarasııa tapsyrýy tıis JK, JShS ıeleri men onyń jubaılary jappaı kásipterin jabý úshin jantalasyp jatqany jasyryn emes. Qarjygerler qoǵamda qalyptasqan bul úrdis durys emes deıdi. Osy jaǵdaıatta eskeretini, qyzmetin toqtatqan IP, TOO-ny jabý utymdy bolsa, JK, JShS arqyly tabys taýyp turǵan kásipti jabýdyń qajeti joq. Kerisinshe, tabysy bar JK, JShS jabý qaltańyzdy qarjydan qaǵyp qana qoımaı, zańsyz áreket jasaýǵa ıtermeleýi múmkin. Eń utymdy sheshim, kásibińizdi ári qaraı dóńgeletip, belgilengen mólsherde salyqty tóleý. Áıtpegende alyp-satý boıynsha múlkińizdiń qunynan jyldyq tabysyńyz asyp ketse, memlekettik organdar jemqorlyq deregi boıynsha arnaıy tekseris júrgizýge quqyly. Qandaı jaǵdaıda da sizdiń jáne jubaıyńyzdyń banktik shottary bazadan anyq kórinetinin umytpańyz.
Qarapaıym mysal keltireıik, 2024 jyly 30 mıllıon teńgelik avtokólik satyp aldyńyz deıik. Eger 12 aıdaǵy tabysyńyz bul sýmmaǵa jetpese, nesıe rásimdegen bolmasańyz, múlikti qandaı tabysqa alǵanyńyz tekseriledi. О́tken jylǵy tapsyrǵan deklarasııadaǵy qujatta tabys, aktıvterińiz tolyq kórsetilmese jemqorlyq deregine kúmán týyndaýy bek múmkin.
Eger azamat anyqtalǵan merzimde deklarasııa tapsyrmaı, bir rettik eskertýdi eskermese 15 AEK (51 750 tg) kóleminde aıyppul salynady.
