Dana Tóleýbaıqyzynyń negizgi mamandyǵy – aǵylshyn tiliniń muǵalimi. Keıingi 16 jyldan beri Qazaqstandaǵy Qyzyl jarty aı qozǵalysynyń belsendi múshesi. Koronavırýs pandemııasy men Ekibastuzdyń jylý júıesindegi apat ýaqytynda tynbaı jumys istep, qoǵamǵa zor eńbegin sińirdi. Pandemııa kezinde ol ózi sııaqty eriktilermen birge Qazaqstannyń birneshe óńirin aralap, karantınniń kesirinen úılerinen shyǵa almaı qalǵan otbasylarǵa dári-dármek pen azyq-túlik, múmkindigi shekteýli jandarǵa qajetti qural-jabdyqtaryn jetkizdi.
– Qyzyq bolǵanda, Pavlodar qalasyna sol ýaqytta Italııadan erli-zaıypty týrıster kelgen eken. Bul ýaqytta atalǵan memlekettiń ózinde qaýipti indet qatty tarap jatqan. Álgi adamdar bizdiń shaharda uzaq aıaldap, men olarǵa biraz ýaqyt azyq-túligin jetkizip turdym. Erli-zaıyptylar ózderiniń juptasqandaryna 50 jyl tolýyn karantın ýaqytynda Kerekýde atap ótti. Odan soń Jeńis merekesinde tyl eńbekkerleriniń úılerine memlekettik nagradalaryn aparyp tapsyrdyq. Qaýipti vırýstyń aldyn alý taqyrybynda únemi sabaqtar ótkizip, úlken-kishiniń arasynda dárister oqydyq, – dep eske alady sol bir qaýyrt kúnderdi Dana apaı.
Onyń bul eńbegi eskerilip, «Halyq alǵysy» medalimen, eriktilerge beriletin halyqaralyq syılyqpen marapattaldy. D.Serimbaevanyń odan sońǵy volonterlik qyzmeti byltyr Ekibastuzda tótenshe jaǵdaı rejimi jarııalanǵanda jarqyraı kórindi. Kópti jumyldyryp, páterlerinde búrisip otyrǵan halyqqa jyly kıimder, jylytqyshtar men azyq-túlik taratty. Jurtshylyqtyń boıyn jyly sózderimen jylytty.
Dana apaıdyń aıtýynsha, ony otbasyndaǵylar únemi qoldap júredi. Kishi jáne ortanshy qyzdary anasynyń jolyn qýyp, eriktiler qozǵalysynyń belsendi múshesi atanǵan. Al úlken qyzy qozǵalysqa qarjylaı kómek jasap turady. Apaıdyń joldasy jeke kóligimen eriktilerdi tasyp, bar qolǵabysyn jasaýǵa tyrysady. Onyń ústine pedagog jylyna birneshe márte donorlyqqa qan tapsyrýdy ádetke aınaldyrǵan.
Taǵy bir ereksheligi, ol respýblıkalyq «Tálimgerler» jobasyna da belsene atsalysyp, Pavlodardaǵy balalar aýlynda Dasha esimdi qyzdy óz qamqorlyǵyna alǵan. Keıingi 5 jyl boıy boıjetkendi qoǵamǵa beıimdep, tárbıesin berip keledi. Búginde Dasha óziniń nemerelerimen turaqty baılanysyp, oıyndary jarasyp júrgenin maqtanyshpen jetkizdi.
Aıtyp óteıik, Máshhúr Júsip mektebindegi Qyzyl jarty aı qoǵamynyń fılıaly – «Ashyq júrek» jasaǵy Volonterler jylynda «Pavlodar oblysyndaǵy úzdik eriktiler jasaǵy» atandy.
PAVLODAR
