Bıylǵy qazan aıynda jarııalanǵan reıtıngte álemniń úzdik 100 myń ǵalymynyń jetistikteri 22 ǵylymı sala jáne 174 kishi sala boıynsha taldanǵan. Munda paıyzdyq kórsetkishter belgili bir taqyryp negizinde kem degende 5 jumys jarııalaǵan barlyq ǵalym úshin qarastyrylady. Derekter bazasy dáıeksózderdi, jarııalanymdar men siltemelerdi kórsetetin h-ındeksin, birlesken avtorlyqpen jazylǵan jarııalanymdardy esepke alatyn hm-ındeksin, sondaı-aq qurama kórsetkishti (c-ball) qamtıtyn 200 myńǵa jýyq ǵalymnyń qyzmeti týraly aqparat beredi. Esepteýler ár jyldyń sońynda Scopus júıesindegi barlyq avtorlyq profılge negizdeledi. Úmitkerler Scopus derekqoryndaǵy jarııalanymnyń joǵary belsendiligi men avtorlardyń dáıeksózderi negizinde tańdaldy. Jyl saıynǵy reıtıngti Stenford ýnıversıtetiniń sarapshylary Elsevier ǵylymı baspasynyń sońǵy málimetteri boıynsha júıeli bıblıometrııalyq zertteýler negizinde jasaıdy.
Ǵalym Rátbaı Myrzaqulov ekinshi jyl qatarynan eki reıtıngten de oryn aldy. Onyń birinshisine keıingi bir jylda eń kóp silteme jasalǵan ǵalym retinde ense, ekinshisinde búkil eńbek jolynda álemdegi eń kóp silteme jasalǵan ǵalymdar qatarynda kórsetilgen. «Men úshin bul jetistiktiń mańyzy zor. О́ıtkeni bizdiń ǵylymdy álem jurtshylyǵy moıyndap jatyr. Ýnıversıtetimizdiń, elimizdiń osyndaı deńgeıge jetkenine qýanyshtymyn. Mundaı nátıjege eńbek arqyly qol jetkizýge bolady», deıdi ol.
Aıta keteıik, akademık R.Myrzaqulov 400-den astam ǵylymı eńbektiń avtory, 300-den astam maqalasy ımpakt-faktory joǵary sheteldik jýrnaldarda jarııalanǵan. Qazirgi ýaqytta professordyń Scopus boıynsha Hırsh ındeksi 48-ge teń, al silteme ındeksi 8189-ǵa jetti. 2022 jyly professor ǵylymı jetistikteri úshin fızıka jáne astronomııa boıynsha halyqaralyq Scopus syılyǵymen marapattaldy. Ǵalym Rátbaı Myrzaqulov onynshy jyl qatarynan elimizdiń professor-oqytýshylar quramynyń bas reıtınginde de kósh bastap keledi.
Ol – L.N.Gýmılev atyndaǵy Eýrazııa ulttyq ýnıversıtetinde «Teorııalyq fızıkanyń Eýrazııalyq halyqaralyq ortalyǵy» ǵylymı-zertteý ınstıtýtynyń negizin qalaýshy ári dırektory. Solıtondar teorııasy alǵash ret Edınbýrgte paıda bolsa, ony Qazaqstanǵa tuńǵysh alyp kelgen osy Rátbaı Qaǵazuly. Búginde álemdik qaýymdastyqty tolǵandyrǵan «Myrzaqulov teńdeýleri» men «Myrzaqulov gravıtasııasy» – akademık eńbeginiń nátıjesi. Sonymen qatar sheteldik fızıkterdiń «Myrzaqulov gravıtasııasyn» zerttegen maqalalary kvartıl deńgeıi eń joǵary jýrnaldarda jarııalanyp júr. Rátbaı Qaǵazuly ómirin ǵylymǵa arnaǵan jan. Tek, ózi ǵana emes, balalary da ǵylym salasynda ter tógip júr.
Bı-Fatıma ERALHANQYZY,
L.N.Gýmılev atyndaǵy
EUÝ stýdenti
