Keńeste negizinen salyq saıasaty salasynda júrgizilip jatqan reformalar, ınvestısııalyq yntymaqtastyq, zııatkerlik menshik quqyqtaryn qorǵaý, aýyl sharýashylyǵy taýaryn óndirýshilerdi sýbsıdııalaý, t.b. máselelerge nazar aýdaryldy.
Á.Smaıylov ınvestısııalar tartý ekonomıkalyq ósýdiń negizgi faktorlarynyń jáne Úkimet jumysynyń basymdyqtarynyń biri bolyp qala beretinin atap ótti. Atap aıtqanda, elimizde jeke sharttarda kelisimder jasaýǵa múmkindik beretin ınvestısııalyq sharttardyń jańa tetikteri engizildi. Buǵan qosa Investısııalyq mindettemeler týraly kelisimdi jasasqanda salyq zańnamasynyń turaqtylyǵyna 10 jylǵa kepildik beriledi jáne kúrdeli jobalar úshin Jetildirilgen modeldik kelisimshartty jasasqanda fıskaldyq yntalandyrýlar engiziledi.
«Rezıdent emes tulǵalardan alynǵan materıaldyq emes qyzmetter úshin shegerim somasyn shekteýge qatysty ınvestorlar jıi kóteretin másele sheshildi. Endi bul shekteý tek offshorlyq ıýrısdıksııalardaǵy kompanııalarmen júrgizilgen operasııalarǵa qatysty bolady», dedi Premer-mınıstr.
Úkimet basshysy ınvestısııalyq tartymdylyqty arttyrýdyń mańyzdy aspektileriniń biri boljamdy jáne ashyq salyq saıasaty ekenin atap ótti. Osyǵan baılanysty Qazaqstanda fıskaldyq retteýdi jetildirý úshin jańa Salyq kodeksi ázirlendi. Qazirgi ýaqytta bul bıznes-qoǵamdastyq jáne halyqaralyq uıymdar ókilderimen ártúrli alańda qyzý talqylanyp jatyr. Jyl basynan beri 250-den asa jumys kezdesýi ótkizilip, myńnan asa usynys túsken. Barlyq másele apta saıyn turaqty jumys tobynyń qaraýyna usynylady.
«Qoldanystaǵy yntalandyrýlardy saqtaı otyryp, jańa Salyq kodeksi sheńberinde salyq tóleýshige baǵyttalǵan servıstik ákimshilendirý modeli engiziledi. Salyq eseptiligi – 30 paıyzǵa, al salyq tólemderiniń sany 20 paıyzǵa qysqarady», dedi Á.Smaıylov.
Bul bólshek salyq rejimin qoldaný boıynsha qyzmet túrleri eki esege keńeıtilip, 1 mln-nan asa salyq tóleýshini qamtıtynyn aıtty. Buǵan qosa óńdeý ónerkásibindegi jańa jobalar 3 jylǵa salyqtan bosatylady. Sondaı-aq qabyldanǵan sharalar nátıjesinde Qazaqstan IMD álemdik básekege qabilettilik reıtınginde bir jyl ishinde 6 satyǵa kóterilip, 37-orynǵa taban tiregeni atap ótildi. Talqylaý qorytyndysy boıynsha Úkimet basshysy quzyrly memlekettik organdarǵa aıtylǵan barlyq usynysty pysyqtaýdy tapsyrdy.
