Foto: Ashyq derekkóz
Dúnıejúzindegi MMA sportynyń tańdaýly sańlaqtary qatań súzgiden ótken soń ǵana joly túsetin UFC arenasynda Shavkat Rahmonov osy ýaqytqa deıin 5 márte jekpe-jekke túsip, barlyǵynda jeńiske jetti. Kezekti aıqasyn 16 jeltoqsanda (Astana ýaqytymen 17 jeltoqsanda) AQSh-tyń Las-Vegas qalasynda amerıkalyq Stıven Tompsonǵa qarsy ótkizedi.
Osy jekpe-jek keshiniń Countdown ańdatpasynda Shavkat Rahmonov týraly da keńinen qamtylyp aıtyldy. Buǵan deıin Qazaqstannyń birde-bir sportshysy UFC-diń Countdown beınerolıginiń nazaryna ilingen emes. Countdown – UFC oktagonynda aıqasqa túsetin jaýyngerlerdiń ishindegi shoqtyqtysy týraly jan-jaqty málimet berip, jekpe-jekke qatysty oı-pikirin talqylaıtyn beınerolık. Shavkat dúnıejúzine taralatyn beınerolıkte ózi jaıyndaǵy málimetti qazaq tilinde baıandady.
