Sýretti túsirgen – avtor
Qazaqstannyń Halyq jazýshysy, Memlekettik syılyqtyń laýreaty, aqyn-aýdarmashy Qalıjan Bekhojınniń 110 jyldyǵyna oraı «Ertistiń qaıratty qalamgeri» atty ádebı eske alý keshi ótti. Buqar jyraý atyndaǵy ádebıet jáne óner mýzeıi men S.Toraıǵyrov atyndaǵy oblystyq kitaphana muryndyq bolǵan is-sharada tulǵanyń kitaptary men jeke zattarynan kórme usynyldy.
Aqynǵa «Meniń zamandastarym» kitaby úshin QazKSR-nyń Abaı atyndaǵy Memlekettik syılyǵy berildi. Keıin óren urpaqty otanshyldyqqa baýlý maqsatynda «Jýsan» poemasyn jazdy. Jazýshy, ardager jýrnalıst Ǵalymbek Jumatov atap ótkendeı, kirshiksiz mahabbattyń rámizindeı bolǵan «Dýdar-aı» áni negizinde «Marııam Jagorqyzy» atty poema jazǵan qalamger aýyz ádebıetimizdegi lıroepostyq jyrlarymyzdy jańa bir qyrynan sátti jalǵastyra bildi. Al «Áppaqnamesi» adal da taza sezimge baýlıdy.
Fılologııa ǵylymdarynyń doktory, professor Seıfıddın Sútjanov Qalıjannyń ákesi Nurǵoja zamanynda elge belgili aqyn atanyp, ataqty Aqan serimen, áýlıe Máshhúr Júsippen, Isa Baızaqovpen, óner qaıratkeri Nurlybek Baımuratovpen aıtysqa túskenin áńgimeledi. Nurǵoja Troısk qalasyndaǵy Zeınolla ıshannyń medresesin úzdik bitirgen. Keıbir bolystardy shenep syn aıtqan. 1932 jyly Sáken Seıfýllın Aqan seriniń óleńderin basyp shyǵarǵanda jınaqta Aqan seri men Súıindik Nurǵojanyń aıtysy keltirilgen.
Ertis-Baıan óńirinde týyp-ósip, aq basty Alataýǵa qanat qaǵyp, qazaq ádebıetiniń aıtýly saıypqyranyna aınalǵan Q.Bekhojınniń esimi otty jyrlary arqyly el esinde máńgilikke saqtalady dep senemiz. Aqynnyń artyndaǵy mol murasy qazaq ádebıetiniń jaýharlaryna aınalyp, jyl ótken saıyn jarqyraı bermek.
Búginde Almaty, Pavlodar qalalaryndaǵy kósheler, Pavlodar qalasyndaǵy bir mektep aqynnyń esimimen atalady.
PAVLODAR
