«Ekibastuz jylý-energo» JShS taratqan málimetke súıensek, apattyq jaǵdaı 10 jeltoqsan kúni túngi saǵat birlerdiń shamasynda oryn alǵan. Stansada sol sátte jumys istep turǵan 7 qazandyqtyń úsheýi birden mazýtqa aýystyryldy. Mazýttyń qyzýy kómirge qaraǵanda azyraq, soǵan oraı ortalyqtan shyǵatyn jylý tasymaldaǵyshtardyń temperatýrasy 60-70 gradýsqa deıin tómendep qaldy.
Bul kúni qalada tutastaı ortalyqtandyrylǵan jylý parametrleri tómendep, páterlerdegi jylý batareıalarynyń qyzýy qanjylym bolyp qaldy. Al jylý maýsymy bastalǵaly onsyz da jaǵdaıy máz emes kópqabatty turǵyn úıler tipti salqyndap, páterler ishindegi temperatýra +10 gradýsqa deıin tómendegen. Mysal úshin Lomonosov kóshesi, 11A mekenjaıynda ornalasqan úı turǵyny, zeınetker Aman Masyǵapov atap ótkendeı, qazan aıynan beri mundaǵy páterler jylýǵa jaryp kórmepti. Ary ketse +16 gradýs jylylyqty kórsetken. Soǵan qaraǵanda búginde Ekibastuzdyń ishki jelilerindegi máseleler tolyq sheshilmegen, jańa júıeler men qubyrlar salynǵanymen jylý aınalymynyń jaǵdaıy máz emes.
Oblys ákimi Asaıyn Baıhanov sol kúni apat oryn alǵan jerge baryp, tolyq aýyzdyqtalǵansha stansada boldy. Ákim óziniń ınstagram paraqshasynda jazǵandaı, oryn alǵan aqaý úsh saǵattyń ishinde joıylǵan. Jınalǵan sý tolyǵymen sorylyp alynǵan soń sý jylytý qazandyqtary mazýttan kómirge tolyq aýystyryldy. Al dúısenbi kúni tańerteńgilik stansa belgilengen parametrlerge shyqty. Alty qazandyq agregaty jumys istep, saǵat ondar shamasynda ortalyqtan shyǵatyn jylýdyń qyzýy 83 gradýsqa jetkizildi. Keshe tústen keıin keıbir páterlerdegi temperatýra kóterile bastaǵany habar jetti. Degenmen sýyq úılerdiń sany áli de barshylyq. Bul tizimge Energetıkter, Berkimbaev, Kósherbaev, Tolstoı, Toraıǵyrov, Pishenbaev jáne taǵy basqa kóshelerdegi kópqabatty baspanalar tirkelip otyr.
Oblys aýmaǵynda aldaǵy eki kúnde aıaz kúsheıedi degen aqpar bar. Qazirgi kúni Pavlodar men Aqsý qalalarynda da jylýǵa jarymaı otyrǵan jekelegen kópqabatty úıler barshylyq. Degenmen olardyń jaǵdaıy kenshiler qalasymen salystyrǵanda shúkir deýge bolady. Ekibastuz halqynyń aıazda jaýrap qalmaýyn tileımiz.
Pavlodar oblysy,
Ekibastuz qalasy
