aqorda_resmi
«О́zderińizge belgili, buǵan deıin otandyq bıznesti negizsiz tekserýler men zańsyz qylmystyq qýdalaýdan qorǵaý jóninde tapsyrma bergen bolatynmyn. Qabyldanǵan sharalardyń nátıjesinde kásipkerlik salasyndaǵy tirkelgen qylmystar sany eki ese azaıdy (837-den 402-ge deıin). Aqtaý negizi boıynsha toqtatylǵan qylmystyq ister sany shamamen bes ese qysqardy (416-dan 92-ge deıin). Investısııalyq jobalardy prokýratýra organdarynyń servıstik qadaǵalaýyna basa mán beriledi. Investısııalyq jobalardy «jasyl dáliz» qaǵıdaty boıynsha qoldaý júıesi engiziledi. Bul ınvestorlarǵa ruqsat beretin qujatty alý isin ońaılatady jáne jedeldetedi. Sondaı-aq olarǵa jer ýchaskelerin berý jáne kommýnıkasııa júrgizý jumystaryn jeńildetedi», dedi Memleket basshysy.
Sonymen qatar Prezıdent sıfrlyq platformany qurýdyń tym sıyrquımyshaqtanyp ketkenin de eskertti.
«Sıfrlyq platformany sozbalańǵa sala bermeı, tez arada qurý asa mańyzdy. Sol arqyly ınvestısııalyq jobalardyń júzege asyrylý prosesin naqty ýaqyt rejıminde baqylaýǵa bolady. Memlekettik organdardyń ınvestorlarǵa qatysty barlyq sheshimi men shekteý sharalary boıynsha «prokýrorlyq súzgi» jumys isteı bastaıdy. Osylaısha, biz ınvestorlardy negizsiz aıyppuldar men salyqtardan, ádiletsiz jáne uzaqqa sozylǵan sot daýlarynan qorǵaımyz. Jalpy, bıznes úshin ádil ári ashyq oıyn erejesin qamtamasyz etýge bar kúsh-jigerimizdi jumsaımyz. Elimizde jasandy ıntellekt júıesin qurý – óz aldyna bólek ári óte mańyzdy másele. Qazaqstannyń bolashaǵy jáne onyń halyqaralyq qoǵamdastyqtaǵy orny osy jumystyń sátti iske asýyna baılanysty», dedi Q.Toqaev.
Prezıdent osy salaǵa ózi jetekshilik etetinin, otandyq hám sheteldik mamandarmen júzdesip, júktelgen mindetterdiń oryndalýyn baqylaýda ustaıtynyn aıtty.
