Prezıdent ekonomıkanyń negizgi kúshine balanyp otyrǵan kásipkerlikti jóndi-jónsiz tekserý azaıatynyn aıtty. Bıznesti ınspeksııalyq tekserý endi eki ese qysqarady.
«Úkimet pen bıznes-qoǵamdastyq birlesip, kásipkerlikti damytýǵa kedergi keltiretin artyq talaptardy anyqtaý úshin aýqymdy jumystar júrgizdi. Sonyń nátıjesinde, 10 myńnan astam zań normasy jańa retteýshi saıasattyń negizgi talaptaryna saı kelmeıtini anyqtaldy. Búginde onyń 90 paıyzy kúshin joıdy. Qalǵany jyl sońyna deıin retke keltiriledi.
Syn-qaterlerdi basqarýdyń avtomattandyrylǵan júıesi baqylaýshy organdardyń bızneske qysymyn shekteýdiń mańyzdy quralyna aınalady. Ol 2024 jyldyń 1 qańtarynan bastap iske qosylady jáne adamnyń qatysýynsyz tekserýdi belgileýge múmkindik beredi. Nátıjesinde, bızneske josparly ınspeksııa jasaý eki ese qysqarady. Al aıyppuldar sany birneshe ese azaıady», dedi Qasym-Jomart Toqaev.
Búginde bıznes pen memleket arasyndaǵy ornyqty qatynasqa jańa ázirlenip jatqan Salyq kodeksi oń áser etpek. Kodeks negizinde kásipkerlerge salynatyn salyq tártibi ońtaıly tásilge kóshpek. Jańa Salyq kodeksi bıznes ókilderiniń kóp jaǵdaıda aıyppul arqalaýynan aman saqtaıdy.
«Bıznes sýbektileriniń salyqtyq esebin 30 paıyzǵa azaıtý josparlanyp otyr. Salyqtyq tólemder sany kem degende 20 paıyzǵa ońtaılandyrylady. Kólik quraldaryna arnalǵan salyq boıynsha esep aıyrysý men deklarasııa, sondaı-aq jer men múlik salyǵyna qatysty júkteme bir mıllıon teńgeden az bolsa, esep aıyrysý alynyp tastalady. Kásipkerlerdiń bankterdegi shottaryn buǵattaý kezinde olardyń salyqtyq qaryzyna teń kólemdegi qarjysyna ǵana shekteý qoıylady», dedi Prezıdent «Altyn sapa» jáne «Paryz» syılyǵynyń laýreattaryn marapattaý rásiminde.
