Foto: ashyq derekkóz
Memleket basshysy halyq sanynyń kóbeıýimen qatar azamattardyń ortasha ómir súrý jasynyń kóbeıgenin tilge tıek etti.
«Jaqynda Qazaqstan halqynyń sany 20 mıllıonǵa jetti. Bul – tarıhı beles. Oǵan búkil el bolyp qýandyq. Halyq sanynyń kóbeıýi memleketimizdiń damýyna qosymsha serpin berip, elimizge abyroı ákeletinine esh kúmán joq. Sondyqtan bizdiń negizgi maqsatymyz – barsha jurtymyzdyń sapaly turmysyn qamtamasyz etý. Byltyr elimizdegi ortasha ómir súrý uzaqtyǵy 74,4 jasqa jetti. Bul – elimizdegi medısınalyq qyzmettiń sapasymen qatar, azamattardyń ál-aýqaty jaqsaryp jatyr degen sóz», dedi Prezıdent.
Sonymen birge, Qasym-Jomart Toqaev halyq arasynda kreatıv ındýstrııa men mádenıettiń qanat jaıyp kele jatqanyna mán berdi.
«Ult rýhanııaty da jańasha órken jaıyp keledi. Iri qalalarda, aýyl-aımaqtarda mádenı jańǵyrý baıqalýda. Mysaly, elimizdiń ár túkpirinde apta saıyn ondaǵan konsert, spektakl qoıylady. Soǵan qaramastan jurt teatrǵa bılet tappaı jatady. Qoǵamymyzda, ásirese jastar qaýymynda kreatıvti ındýstrııa qarqyndy damyp kele jatyr. Bul – óte jaqsy úderis», dep atap ótti Memleket basshysy.
Aıta keteıik, osydan 10 jyl buryn, 2013 jyly elimizdegi azamattardyń ómir súrý uzaqtyǵy 70, 6 jas bolǵan.
