Foto: Ǵylym jáne joǵary bilim mınıstrligi
Elimizdiń túkpir-túkpirinen kelgen Ilııastanýshy ǵalymdar men stýdent jastar qatysqan konferensııada I.Jansúgirovtiń ómiri men shyǵarmashylyǵy jan-jaqty talqylandy.
Jıynda baıandama jasaǵan f.ǵ.k., qaýymdastyrylǵan professor, fılologtardy daıarlaý jónindegi dosent Shara Qııahmetova burynǵy zertteý jumystarynda tabylǵan birqatar dúdámal derekti atap ótti.
«Batyr Qalmyrzaevtyń «Ilııas Jansúgirov jáne «Qazaq» gazeti» atty maqalasynda Ilııas dep kórsetken 1914-1916 jyldar aralyǵynda «Qaptaǵaı» atty búrkenshik atpen «Qazaq» gazetinde jarııalanǵan, qazaq halqynyń ımperıalıstik soǵysqa jáne áskerı salyq tóleýge qatysy týraly maqala Bilál Súleevke tıesili. Aqyn ómirbaıanyna sáıkes ol óziniń alǵashqy maqalasyn 1921 jylǵy 22 naýryzdaǵy «Jas alash» gazetinde «Zamandastaryna Joldaý» dep ataıdy. Ol týraly: «1931 jylǵy «Jańa ádebıet» jýrnalynyń 6-7 sanynda jarııalanǵan ómirbaıanynda Ilııas óziniń qalam jumysyna 1920 jyldan bastap aralasa bastaǵanyn jazǵan», dedi Sh.Qııahmetova. Sondaı-aq fotoarhıvterde beınelengen tulǵalardy sáıkestendirý arqyly dálelderin keltirdi.
Plenarlyq otyrysqa ál-Farabı atyndaǵy QazUÝ-dyń professory, f.ǵ.d. Saýle Erjanova, f.ǵ.d., «Ilııastaný» ǵylymı-praktıkalyq ortalyǵynyń meńgerýshisi professor Muratbek Imangazınov, f.ǵ.k., QazUqyzPÝ professorynyń m.a., Lázzat Ádilbekova qatysyp, Ilııas shyǵarmalarynyń ǵylymı-teorııalyq máselelerin kóterdi.
Konferensııa sońynda Sh.Qııahmetovanyń «Ilııastaný» oqýlyǵynyń tusaýy kesildi.
